खंडणीप्रकरणी पोलिस कोठडीत वाढ

पुणे, ता. २७ ः बांधकाम व्यावसायिक वडिलांच्या कंपनीतून ४६ लाख ९७ हजार रुपयांची खंडणी उकळून आणखी दोन लाख रुपयांच्या खंडणीसाठी अकाउंटंट, भागीदार आणि पुणे बार असोसिएशनच्या (पीबीए) माजी अध्यक्ष व कुटुंबीयांना ठार मारण्याची धमकी दिल्याप्रकरणात मुलाच्या पोलिस कोठडी दोन दिवस वाढ करण्यात आली आहे. अतिरिक्त मुख्य न्यायदंडाधिकारी वाय. डी. कोईनकर यांनी हा आदेश दिला.
धीरज दिनेशचंद्र ऊर्फ बाळासाहेब अरगडे (वय ३९, रा. खडकी) असे कोठडी झालेल्या आरोपीचे नाव आहे. पोलिस कोठडीची मुदत संपल्याने त्याला सोमवारी (ता. २६) न्यायालयात हजर करण्यात आले होते. सरकारी पक्षातर्फे सहायक सरकारी वकील श्रीधर जावळे, मूळ फिर्यादीच्या वतीने अ‍ॅड. सूचित मुंदडा व अ‍ॅड. विक्रांत कदम यांनी काम पाहिले. ‘पीबीए’चे माजी अध्यक्ष अ‍ॅड. राजेंद्र दौंडकर यांना धमकी दिली असल्याने ‘पीबीए’चे अध्यक्ष अ‍ॅड. हेमंत झंजाड यांच्यासह वकील वर्ग मोठ्या संख्येने उपस्थित होता.
धीरज याचे वडील बाळासाहेब येरवडा कारागृहात होते. त्यावेळी त्यांनी आर्थिक व्यवहाराचे अधिकार अकाउंटंट अनिल अरगडे आणि भागीदार भाचे उमेश बारणे यांना दिले होते. त्यावेळी या दोघांना धमकावून खंडणी वसूल करण्यात आली होती. याबाबत अनिल अरगडे यांनी पोलिसात फिर्याद दिली आहे. उकळण्यात आलेल्या खंडणीतून सोने, चारचाकी गाडी घेण्यात आली आहे. त्याबाबत व उर्वरित पैशाचे काय केले, याच्या शोधासाठी त्याच्या पोलिस कोठडीत वाढ करण्याचा युक्तिवाद सरकारी वकिलांनी केला.