मयूरी जगताप प्रकरणाबाबत कारवाईचे निर्देश दिले होते

पुणे, ता. २७ : वैष्णवी हगवणे यांची जाऊ मयूरी जगताप-हगवणे यांना कौटुंबिक छळास सामोरे जावे लागत असल्याची तक्रार मेघराज जगताप आणि लता जगताप यांनी ई-मेलद्वारे राज्य महिला आयोगाकडे दाखल केली होती. तक्रार आल्यानंतर आयोगाकडून पौड ठाण्यातील वरिष्ठ पोलिस निरीक्षकांना या प्रकरणात कारवाई करण्याबाबत निर्देश दिले होते, अशी माहिती राज्य महिला आयोगाच्या सदस्य सचिव डॉ. पद्मश्री बैनाडे यांनी दिली.
वैष्णवी हगवणे यांच्या मृत्यू प्रकरणाची दखल घेत आयोगाने बावधन पोलिसांना तातडीने कारवाई करण्याचे निर्देश दिले होते. त्यानुसार बावधन पोलिसांनी सर्व आरोपींना अटक केली असून पुढील कारवाई सुरु आहे. त्याचप्रमाणे मयूरी जगताप यांच्या कौटुंबिक छळाच्या प्रकरणातही पोलिसांना कारवाईचे निर्देश दिल्यानुसार त्यांनी तक्रार दाखल करून पुढील तपास केला. पोलिस तपासाबाबत असमाधानी असल्याचे किंवा इतर कुठल्याही बाबींबाबत तक्रारदार किंवा त्यांच्या कुटुंबीयांनी आयोगाशी संपर्क साधलेला नाही, असेही त्यांनी स्पष्ट केले.