बीबीए, बीसीए अभ्यासक्रमाच्या सत्र परीक्षांची प्रवेशपत्र उपलब्ध

पुणे, ता. २८ : सावित्रीबाई फुले पुणे विद्यापीठाशी संलग्न महाविद्यालये आणि मान्यताप्राप्त परिसंस्थांमधील शैक्षणिक वर्ष २०२४-२५ मधील उन्हाळी सत्रात केवळ महाविद्यालय स्तरावर आयोजित केलेल्या प्रथम वर्ष बीबीए, बीबीए (कॉम्प्युटर ॲप्लिकेशन), बीबीए (इंटरनॅशनल बिझनेस), बीसीए (वाणिज्य), बीसीए (विज्ञान) या अभ्यासक्रमांचे नियमित अथवा पुनर्परीक्षार्थींची एकत्रित परीक्षा प्रवेशपत्रे संबंधित महाविद्यालयांच्या लॉगिनमध्ये उपलब्ध करून दिली आहेत.
या परीक्षा प्रवेशपत्रात काही त्रुटी, आवश्यक विषयांचा समावेश नसणे, नावातील दुरुस्ती, अतिरिक्त/कमी विषय, ॲड ऑन क्रेडिट विषयांचा समावेश नसणे, असे असल्यास त्यामध्ये आवश्यक ती दुरुस्ती महाविद्यालयाने करावी, असा आदेश सावित्रीबाई फुले पुणे विद्यापीठाच्या छाननी व तालिनीकरण कक्षाने दिली आहे.
विविध अभ्यासक्रमांच्या परीक्षांचे निकाल हे दिलेल्या मुदतीत जाहीर करण्याच्या अनुषंगाने यानंतर कोणत्याही परिस्थितीत अंतर्गत गुण भरण्यासाठी मुदतवाढ देण्यात येणार नाही. तसेच, परीक्षांचे निकाल झाल्यानंतर अंतर्गत गुणांबाबत प्राप्त होणारी सर्व प्रकरणे ही प्रमाद समितीसमोर सादर करण्यात येतील, असेही विद्यापीठाच्या छाननी व तालिनीकरण कक्षाचे उपकुलसचिव प्रदीप कोळी यांनी परिपत्रकात नमूद केले आहे.

- प्रवेशपत्रामध्ये दुरुस्तीचा कालावधी : २८ ते ३१ मे
- अंतर्गत गुण भरण्याचा कालावधी : २८ मे ते १० जून