अमर वोरा यांचा २७ वर्षांत रक्तदानाचा विक्रम

पुणे, ता. २९ : सहकारनगर येथील संध्या सहकारी गृहरचना संस्था मर्यादिततर्फे आयोजित कार्यक्रमात अमर वोरा यांचा सन्मान करण्यात आला. वोरा यांनी २७ वर्षांत ११५ वेळा रक्तदान केल्याप्रीत्यर्थ हा सन्मान झाला. समारंभात सोसायटीतील सदस्य उपस्थित होते. वोरा म्हणाले, ‘‘सर्व युवकांनी दर तीन महिन्यांनी रक्तदान करावे. जेवढे रक्तदान केले, तेवढे नवीन रक्त शरीरात तयार होते. उत्साह व सामाजिक कार्य केल्याचे समाधान वाटते. रुग्णांना रक्त दिल्याने तो बरा होऊन त्याला जीवदान मिळते.’’

शेतीचे पंचनामे करण्याची मागणी
पुणे, ता. २९ : अवकाळी पावसामुळे महाराष्ट्रातील शेतकऱ्यांचे नुकसान झाले आहे. त्यामुळे सरकारने नुकसानीचे तत्काळ पंचनामे करावेत. मात्र ते केवळ कागदावर न राहता शेतकऱ्यांना प्रत्यक्ष आणि तत्काळ मदत मिळाली पाहिजे, अशी मागणी रिपब्लिकन पार्टी ऑफ इंडियाचे (यादव गट) राष्ट्रीय नेते गंगाधर यादव यांनी केली. राज्यातील अनेक गावांत पूरस्थिती निर्माण झाली आहे. घरांत पाणी शिरले आहे. शेतीचे नुकसान झाले आहे. त्यामुळे राज्यातील आपत्ती व्यवस्थापनाच्या यंत्रणांनी नेहमी सतर्क राहिले पाहिजे, असेही आवाहन यादव यांनी केले.