स्वरयज्ञ संगीत महोत्सवाचे शनिवारी-रविवारी आयोजन

पुणे, ता. २९ : भारतीय शास्त्रीय कला-संस्कृतीच्या वारशाचे जतन करत पुढील पिढीला त्याची ओळख व्हावी, यासाठी येरवडा परिसरातील एस.एन.बी.पी. माध्यमिक व उच्च माध्यमिक विद्यालय आणि एस. ई. सोसायटीतर्फे शनिवारी-रविवारी (ता. ४ आणि ५ ऑक्टोबर) ‌‘स्वरयज्ञ‌’ या संगीत महोत्सवाचे आयोजन करण्यात आले आहे. या महोत्सवात बासरीवादक पद्मविभूषण पंडित हरिप्रसाद चौरासिया यांचा विशेष सहभाग हे यंदाच्या महोत्सवाचे वैशिष्ट्य आहे.

ज्येष्ठ समाजसेवक पद्मश्री गिरीश प्रभुणे हे प्रमुख पाहुणे म्हणून उपस्थित असतील. गायन-वादन आणि नृत्याची पर्वणी असलेला हा महोत्सव दोनही दिवशी सायंकाळी पाच वाजता विद्यालयातील सरस्वती हॉलमध्ये होणार असून, महोत्सव सर्वांसाठी खुला आहे, अशी माहिती प्राचार्य रश्मी शुक्ला व शिक्षक विनायक गुरव यांनी पत्रकार परिषदेत दिली.

महोत्सवाच्या पहिल्या दिवशी (ता. ४) विद्यार्थ्यांचे सादरीकरण होईल. त्यानंतर विदुषी मधुश्री नारायण यांचे गायन, सत्यजित तळवलकर यांचे एकल तबलावादन व विदुषी सानिया पाटणकर यांचे गायन होणार आहे. दुसऱ्या दिवशी त्रिवेंद्रम येथील नाट्यविधा परफॉर्मिंग आर्ट सेंटरच्या विद्यार्थ्यांचा नृत्याविष्कार होणार आहे. त्यानंतर विदुषी डॉ. रिता देव यांचे गायन होणार असून, पद्मविभूषण पंडित हरिप्रसाद चौरासिया यांच्या बासरीवादनाचा कार्यक्रम होणार आहे.