बालशिवाजी मित्रमंडळाचा नवरात्रोत्सव उत्साहात

पुणे, ता. १ : नवरात्रोत्सवानिमित्त दत्तवाडी येथील बालशिवाजी मित्रमंडळाच्या वतीने विविध उपक्रमांचे आयोजन केले होते. त्यात लहान मुलांसाठी चित्रकला, हस्तकला, गायन, वादन स्पर्धा आदी कार्यक्रम घेण्यात आले. तर, गरबा आणि लोककला सादरीकरण, स्त्रियांसाठी भोंडला, दररोजची महाआरती, अन्नदान यांचाही समावेश होता.
नवरात्रीचे नऊ दिवस विविध धार्मिक कार्यक्रम झाले. दसऱ्याच्या दिवशी मंदिराचा वर्धापन दिन साजरा होणार असून, यंदा दुर्गा माता मंदिरास ३७ वर्षे पूर्ण होत आहेत. मंडळ गेल्या ४१ वर्षांपासून भक्तिभाव, संस्कार आणि सामाजिक जाण यांचा वारसा जपत आहे. मंडळाचा १९८४ साली सुरू झालेला हा प्रवास आजही उत्साह, नावीन्य, लोकाभिमुख उपक्रम आणि भक्तिभावाने उजळून निघाला आहे.