सूर्यदत्त नॅशनल स्कूलची ‘नाबेट’ मानांकनात बाजी

पुणे, ता. ४ : दी नॅशनल अक्रेडिएशन बोर्ड फॉर एज्युकेशन अँड ट्रेनिंगच्या (नाबेट) मानांकनात सूर्यदत्त एज्युकेशन फाउंडेशन संचालित सूर्यदत्त नॅशनल स्कूलला घवघवीत यश मिळाले आहे. राज्यातील एक हजार ६४२ शाळांपैकी केवळ २० शाळा ‘नाबेट’ मानांकनासाठी पात्र ठरल्या आहेत. त्यात पुण्यातील चार शाळांचा समावेश आहे.
‘नाबेट’तर्फे राष्ट्रीय आणि आंतरराष्ट्रीय मानदंडाची पूर्तता करणाऱ्या शिक्षण संस्थांना मानांकन देऊन गौरविण्यात येते. सूर्यदत्त नॅशनल स्कूल ही बावधनमध्ये आहे. शाळेचा दृष्टिकोन, दस्तऐवजांचे परीक्षण, नोंदी, अहवालांचे निरीक्षण, शिक्षक-विद्यार्थी-पालकांच्या मुलाखती, अध्यापन-अध्ययन प्रक्रियेचे मूल्यमापन, पायाभूत सुविधा, आरोग्य आणि सुरक्षिततेच्या उपाययोजनांची तपासणी करण्यात आली.
फाउंडेशनचे संस्थापक-अध्यक्ष डॉ. संजय चोरडिया म्हणाले, ‘‘हे मानांकन हा एक ऐतिहासिक टप्पा आहे. या यशात विद्यार्थी, शिक्षक आणि कर्मचाऱ्यांचा मोलाचा वाटा आहे. या मानांकनामुळे शाळेत सुरू असलेल्या उपक्रमांना प्रोत्साहन मिळेल.’’