पाच हजार मतदान केंद्रांची आवश्‍यकता

पुणे, ता. ६ : पुणे महापालिकेच्या आगामी निवडणुकीसाठी प्रभाग रचना अंतिम झाल्यानंतर आता मतदार याद्या आणि मतदान केंद्रांची तयारी सुरू केली आहे. मतदारांच्या सोईसाठी मतदान केंद्रांची संख्या वाढवली जाणार आहे. यावेळी सुमारे पाच हजार मतदान केंद्रांची आवश्यकता आहे. यासाठी जागांची पाहणी लवकरच सुरू होणार आहे, अशी माहिती अतिरिक्त आयुक्त ओमप्रकाश दिवटे यांनी दिली.
महापालिकेच्या प्रभागांची अंतिम रचना नुकतीच जाहीर झाली आहे. या रचनेनुसार आता मतदार याद्यांचे विभाजन, मतदान केंद्रांची निश्चिती आणि प्रभागनिहाय नियोजनाची प्रक्रिया सुरू होणार आहे. यासंदर्भात सोमवारी महापालिकेत बैठक पार पडली. या बैठकीत बुथनिहाय नियोजन, मतदान केंद्रांची निवड आणि जबाबदाऱ्या निश्चित करण्यात आल्या आहेत. निवडणूक आयोगाकडून मतदानाची टक्केवारी वाढविण्यासाठी प्रयत्न सुरू आहेत. त्यामध्ये नागरिकांना घराजवळ व सोईचे मतदान केंद्र स्थापन करावेत, अशा सूचना आयोगाने दिलेल्या आहेत. त्यानुसार पुणे शहरात मतदान केंद्राची ठिकाणी निश्‍चित करण्यासाठी जागा पाहणी सुरू करण्याचे आदेश बैठकीत देण्यात आले. महापालिका प्रशासनाने निवडणूकपूर्व तयारीसाठी मतदार केंद्रांची पाहणी, जागा निश्‍चिती आणि डेटा तपासणीचे काम पुढील काही दिवसांत सुरू करण्याची तयारी केली आहे. मतदान केंद्रांच्या कामकाजाची जबाबदारी उपायुक्त अरविंद माळी यांच्याकडे देण्यात आली आहे. गेल्या वर्षी झालेल्या विधानसभा निवडणुकीतील मतदान केंद्रांचा तपशील तपासून, आवश्यक ठिकाणी नवीन केंद्रांची निर्मिती करण्याचे निर्देश देण्यात आले आहेत.

मतदारयादीसाठी सॉफ्टवेअर
पूर्वी मतदार याद्यांचे विभाजन हे महापालिकेचे कर्मचारी करत होते. त्यामुळे त्यात त्रुटी राहून मतदार यादीत घोळ होत होता. अनेकदा एकाच कुटुंबातील सदस्यांची नावे वेगवेगळ्या प्रभागांतील केंद्रांवर जातात किंवा काही नावे वगळली जातात. त्यातून मतदानाची टक्केवारी घसरते. हे प्रकार टाळण्यासाठी यावेळी सॉफ्टवेअरचा वापर करून मतदार याद्यांची विभागणी केली जाणार आहे. मतदार याद्या अचूक असाव्यात यावर आमचा भर आहे, असे दिवटे सांगितले.