विधी महाविद्यालय रस्त्यावर पोलिस अंमलदारावर कोयत्याने वार

पुणे, ता. ६ : कार्यालयातून घरी निघालेल्या पोलिस अंमलदारावर दोघांनी कोयत्याने वार केले. ही घटना विधी महाविद्यालय रस्त्यावर मध्यरात्री घडली. या हल्ल्यात अमोल काटकर (वय ४२, रा. शिवाजीनगर पोलिस वसाहत) हे गंभीर जखमी झाले असून, त्यांची प्रकृती स्थिर आहे.
पोलिसांनी दिलेल्या माहितीनुसार, काटकर हे गुन्हे शाखेच्या वारजे येथील युनिट तीनमध्ये कार्यरत आहेत. ते कार्यालयातून रविवारी मध्यरात्री एक वाजण्याच्या सुमारास दुचाकीवर निघाले होते. कोथरूडवरून एसएनडीटी येथील कॅनॉल रस्त्याने ते विधी महाविद्यालयासमोर आले. त्यावेळी दोघेजण दुचाकीवरून निघाले होते. त्यावेळी गाडी घासल्याच्या कारणावरून त्यांच्यात वाद झाला. तेव्हा दोघा हल्लेखोरांनी त्यांच्या डोक्यात आणि हातावर कोयत्याने वार केले. त्यात ते गंभीर जखमी झाले. त्यांच्यावर खासगी रुग्णालयात उपचार सुरू आहे. याप्रकरणी डेक्कन पोलिस ठाण्यात गुन्हा दाखल करण्यात येत आहे. दरम्यान, यापूर्वी सेनापती बापट रस्ता, विमाननगर परिसरात पोलिस कर्मचाऱ्यांवर प्राणघातक हल्ल्याच्या घटना नुकत्याच घडल्या आहेत.