राष्ट्राविकासात स्थापत्य अभियंत्याचे अनन्यसाधारण महत्त्व : डॉ. धुमाळ

पुणे, ता. ७ : ‘‘राष्ट्राच्या विकासात स्थापत्य अभियंत्याचे महत्त्व अनन्यसाधारण असते. रस्ते, पूल, धरणे, कालवे, बंदरे, विमानतळे, गृहनिर्माण, शाळा-महाविद्यालये व रुग्णालयांसह पायाभूत सुविधांच्या उभारणीत त्यांचे योगदान मूलभूत आहे. त्यामुळे स्थापत्य अभियंत्यांनी नावीन्यता, जबाबदारी व कौशल्याची जोपासना करावी,’’ असे मत जलसंपदा विभागाचे मुख्य अभियंता डॉ. हेमंत धुमाळ यांनी व्यक्त केले.
‘बिल्डर्स असोसिएशन ऑफ इंडिया’तर्फे (बीएआय) अभियंता दिनानिमित्त आयोजित कार्यक्रमात डॉ. धुमाळ बोलत होते. बांधकाम क्षेत्रातील उल्लेखनीय कार्याबद्दल ‘बी.जी. शिर्के उद्योग समूहा’चे उपाध्यक्ष आर.बी. सूर्यवंशी व ‘एसकॉन प्रोजेक्टस’चे संस्थापक नीलेश चव्हाण यांचा विशेष सन्मान करण्यात आला. ‘श्रीकन्स्ट फ्रेमवर्क’चे संचालक दीपक जगदाळे व सहकाऱ्यांचाही गौरव करण्यात आला. यावेळी ‘बीएआय’ महाराष्ट्राचे अध्यक्ष जगन्नाथ जाधव, सचिव मनोज देशमुख, ‘बीएआय’ पुणेचे अध्यक्ष अजय गुजर, उपाध्यक्ष राजाराम हजारे व महेश मायदेव, सचिव सी. एच. रतलानी, खजिनदार महेश राठी उपस्थित होते. समन्वयक सुनील मते व सहसमन्वयक शिवकुमार भल्ला यांनी कार्यक्रमाचे यशस्वी आयोजन केले. संजय आपटे यांनी सूत्रसंचालन केले. सी.एच. रतलानी यांनी आभार मानले.