संतांचे अभंग अनुभवा नव्या शैलीत

पुणे, ता. ७ : ‘आनंदाचे डोही आनंद तरंग’, ‘चल गं सखे पंढरीला’, ‘जोहार मायबाप जोहार’ असे कित्येक अभंग मराठीजनांना तोंडपाठ आहेत. मात्र हे अभंग नव्या ढंगात आणि आगळ्यावेगळ्या शैलीत सादर करणारा ‘अभंग रिपोस्ट’ हा कार्यक्रम अनुभवण्याची संधी पुणेकरांना मिळणार आहे.
‘सकाळ माध्यम समूहा’तर्फे १८ ऑक्टोबरला सायंकाळी ६.३० वाजता स्वारगेटच्या गणेश कला क्रीडा मंच येथे या कार्यक्रमाचे आयोजन करण्यात आले आहे. लोकमान्य को-ऑप. सोसायटी लि. आणि क्रेझी चिझी कॅफे हे या कार्यक्रमाचे सहयोगी प्रायोजक आहेत. या कार्यक्रमाची तिकिटे ticketkhidakee.com या संकेतस्थळावर उपलब्ध आहेत.
भारताला संपन्न आध्यात्मिक परंपरा आणि सांस्कृतिक वैभव लाभले आहे. संतांनी या परंपरेचा जागर करत समाजाच्या सर्वांगीण उन्नतीचा मार्ग दाखवला. भक्ती, प्रेम आणि श्रद्धा यांसारखी मूल्ये समाजात रुजवली. संतांची शिकवण त्यांनी लिहिलेल्या अनेक अभंगांमधून प्रकट होते. त्यामुळे संतांची हीच शिकवण नव्या पिढीपर्यंत पोहोचवण्यासाठी काही तरुण कलाकारांनी एकत्र येत ‘अभंग रिपोस्ट’ या कार्यक्रमाची सुरुवात केली.
संतांनी रचलेले विविध अभंग या कार्यक्रमातून नव्या ढंगात आणि अनोख्या शैलीत सादर केले जातात. गिटार, ड्रम्स अशा आधुनिक वाद्यांची साथ या सादरीकरणाला असते. या बँडच्या सादीरकरणातून नव्या पिढीला अभंगांची गोडी लावण्याचा त्यांचा प्रयत्न आहे. आजवर राज्यातील विविध शहरांसह देश आणि परदेशातही या कार्यक्रमाचे प्रयोग झाले आहेत. त्यांचे ‘वारी’ आणि ‘तुका म्हणे’ असे दोन अल्बमही प्रकाशित झाले आहेत.

‘लोकमान्य’च्या सभासदांना सवलतीत प्रवेशिका
या कार्यक्रमाच्या सशुल्क प्रवेशिका ‘लोकमान्य सोसायटी’च्या सभासदांसाठी सवलतीत उपलब्ध करून देण्यात आल्या आहेत. या सशुल्क प्रवेशिका घेण्यासाठी ९०२२१७३५९७ या क्रमांकावर संपर्क साधावा.

कार्यक्रमाविषयी...
कधी : १८ ऑक्टोबर
केव्हा : सायंकाळी ६.३० वाजता
कुठे : गणेश कला क्रीडा मंच, स्वारगेट