दस्तकारी हाट क्राफ्ट बाजाराचे आयोजन

पुणे, ता. २८ : महापालिकेच्या सहकार्याने दस्तकारी हाट क्राफ्ट बाजाराचे आयोजन केले आहे. सिंहगड रस्ता येथील पु. ल. देशपांडे उद्यानाजवळील ओकायामा मैत्री उद्यानाच्या शेजारील कलाग्राममध्ये हा बाजार भरविण्यात येणार आहे. ३० ऑक्टोबर ते ९ नोव्हेंबर दरम्यान दररोज सकाळी ११ ते रात्री ८ वाजेपर्यंत हा बाजार सर्वांसाठी खुला राहील.
देशभरातील कलावंत आणि कारागिरांच्या १२० पेक्षा अधिक स्टॉल्समधून कला, हस्तकला आणि वस्त्रनिर्मिती पाहता येईल. या बाजाराचे उद्‍घाटन गुरुवारी (ता. ३०) सायंकाळी ५ वाजता नगरविकास राज्यमंत्री माधुरी मिसाळ यांच्या हस्ते होणार आहे. या प्रसंगी महापालिकेचे आयुक्त नवल किशोर राम तसेच अतिरिक्त आयुक्त (विशेष) ओमप्रकाश दिवटे उपस्थित राहणार आहेत, अशी माहिती दस्तकारी हाट समितीच्या अध्यक्षा जया जेटली आणि प्रकल्प प्रमुख चारू वर्मा यांनी दिली.