अभिनेते अमीर खान यांना आर. के. लक्ष्‍मण पुरस्‍कार जाहीर

पुणे, ता. २९ : प्रसिद्ध व्यंगचित्रकार आर. के. लक्ष्मण यांच्या स्‍मृतीनिमित्त त्‍यांच्‍या परिवाराने ‘आर. के. लक्ष्मण ॲवॉर्ड फॉर एक्सलन्स’ पुरस्काराची घोषणा केली आहे. हा पहिलाच पुरस्‍कार प्रसिद्ध अभिनेता, दिग्दर्शक आणि निर्माता अमीर खान यांना प्रदान करण्‍यात येणार आहे. भारतीय चित्रपटसृष्टीतील उत्कृष्ट योगदानाबद्दल अमीर खान यांना हा पुरस्‍कार २३ नोव्‍हेंबरला गहुंजे येथील एमसीए क्रीडांगणावर देण्यात येणार आहे, अशी माहिती आर. के. लक्ष्‍मण यांची स्नुषा उषा लक्ष्‍मण यांनी पत्रकार परिषदेत बुधवारी दिली.
याच दिवशी संगीताचा जादूगार ए. आर. रहमान यांचा ‘ए. आर. रहमान लाइव्ह इन कॉन्सर्ट- अ‍ॅन इव्हिनिंग ऑफ म्युझिक, मेमरीज इन पुणे’ हा संगीताचा (लाइव्ह कॉन्सर्ट) कार्यक्रम संध्याकाळी होईल. त्‍याद्वारे कला, संस्कृती आणि संगीताचा सुंदर संगम अनुभवायला मिळणार आहे. हरिहरन, सुखविंदर सिंग आणि चिन्मयी यांसारखे देशातील प्रसिद्ध गायक ए. आर. रहमान यांच्यासह सादरीकरण करणार आहेत.
आर. के. लक्ष्मण यांची सर्जनशीलता, चिकाटी आणि समाजाभिमुख दृष्टिकोनावर आधारित या पुरस्काराचा उद्देश त्यांच्या कार्यातून प्रेरणा घेणाऱ्या व्यक्तींना सन्मानित करणे हा आहे. संगीताचा कार्यक्रम सशुल्‍क असून त्‍याद्वारे जमा होणारा निधी आर. के. लक्ष्‍मण यांच्‍या बालेवाडीतील संग्रहालयासाठी वापरण्‍यात येईल. हा पुरस्‍कार प्रसिद्ध व्‍यक्‍तीच्‍या हस्‍ते देण्‍यात येणार असून त्‍याचे नावही लवकरच जाहीर करणार असल्याचे उषा लक्ष्‍मण यांनी सांगितले.
.........