पती-पत्नी मृत्युप्रकरणी आरोग्‍य यंत्रणांचा हलगर्जीपणा

पुणे, ता. २९ : सह्याद्री रुग्णालयात यकृत प्रत्यारोपण शस्त्रक्रियेनंतर पती व पत्नीचा मृत्यू झाल्यानंतर आरोग्‍य विभागाने उच्चस्तरीय समिती स्थापन करून चौकशी केली. मात्र, या समितीचा अहवाल दोन महिन्यांनंतरही प्रलंबित आहे. नातेवाइकांनीही रुग्‍णालयाच्‍या हलगर्जीपणाबाबत पोलिसांत तक्रार दिली. दरम्‍यान, या वैद्यकीय हलगर्जीपणाची चौकशी करण्यासाठी अद्याप ससून रुग्णालयाने समितीच नेमली नसल्याचे समोर आले आहे. त्‍यामुळे पती-पत्‍नीच्‍या मृत्‍यू प्रकरणात आरोग्‍य यंत्रणांकडूनच हलगर्जीपणा सुरू आहे.
डेक्कन परिसरातील सह्याद्री रुग्णालयात यकृत प्रत्यारोपानंतर बापू कोमकर यांचा १५ ऑगस्टला मृत्यू झाला. त्‍यानंतर त्‍यांना अर्धे यकृत दान करणाऱ्या पत्‍नी कामिनी कोमकर यांचाही २२ ऑगस्टला मृत्यू झाला होता. रुग्णांच्या नातेवाइकांनी याप्रकरणी सह्याद्री रुग्णालयावर हलगर्जीपणाचा आरोप केल्‍यानंतर या प्रकरणी आरोग्‍य विभागाने चेन्‍नई येथील आंतरराष्‍ट्रीय यकृत प्रत्‍यारोपण समितीचे अध्‍यक्ष डॉ. मोहम्मद रेला यांच्‍या अध्‍यक्षतेखाली उच्‍चस्‍तरीय चौकशी समिती नेमली. या समितीच्‍या सदस्य सचिवपदी पुणे परिमंडळाचे आरोग्य उपसंचालक डॉ. भगवान पवार आहेत. या समितीची बैठक २९ ऑगस्टला दूरदृश्य प्रणालीद्वारे झाली होती. त्यानंतर २५ सप्टेंबरला समितीने प्रत्यक्ष सह्याद्री रुग्णालयाला भेट देऊन चौकशी केली. त्याचदिवशी समितीची बैठकही झाली. यानंतर या समितीने अहवाल तयार केला. मात्र, या अहवालावर कोणतीही कार्यवाही झालेली नाही. तसेच त्‍या अहवालाबाबत माहितीही दिली जात नाही.

या प्रकरणात उपचारांमध्‍ये काही वैद्यकीय निष्‍काळजीपणा झाला का?, याची चौकशी करण्‍यासाठी कोमकर कुटुंबीयांच्या नातेवाइकांनी डेक्कन पोलिस ठाण्यात तक्रार दिली होती. डेक्कन पोलिसांनी ससून रुग्णालयाला सप्टेंबर महिन्यात पत्र पाठवून त्‍यांचे मत मागवले आहे. दरम्‍यान ससून रुग्णालय प्रशासनाने हे पत्र २९ ऑक्टोबरला मिळाल्याची माहिती डॉ. यल्‍लपा जाधव यांनी दिली. याप्रकरणी वैद्यकीय हलगर्जीपणा झाला आहे की नाही?, हे ठरविण्‍यासाठी दोन महिन्यानंतरही ससून रुग्णालयाने समिती स्थापन केली नसल्याचे उघडकीस आले आहे.
याबाबत आरोग्‍य उपसंचालक डॉ. भगवान पवार म्‍हणाले, उच्चस्तरीय समितीने चौकशी करून आरोग्य संचालकांकडे अहवाल सादर केला आहे. आरोग्य संचालक पुढील आठवड्यात दूरदृश्य प्रणालीद्वारे बैठक घेणार असून, यात अंतिम निर्णय घेतला जाणार आहे.

डेक्कन पोलिसांचे पत्र व वैद्यकीय अहवाल ससूनला बुधवारी मिळाला आहे. त्‍यामध्ये काही कागदपत्रे अपूर्ण आहेत. त्‍याबाबत पोलिसांकडे पुन्‍हा कागदपत्रे पाठवण्‍यात येईल. त्‍यानंतर हलगर्जीपणाची चौकशी करण्यासाठी समिती नियुक्त केली जाईल. ही समिती या प्रकरणाची चौकशी करून अहवाल सादर करेल.
- डॉ. यल्लपा जाधव,
वैद्यकीय अधीक्षक, ससून रुग्णालय