वैद्यकीय अभ्यासक्रमात २२० विद्यार्थ्यांवर बंदी

पुणे, ता. ३० : महाराष्ट्र राज्य सामाईक प्रवेश परीक्षा कक्षातर्फे (सीईटी कक्ष) एमबीबीएस आणि बीडीएसच्या एकूण एक हजार ७६४ रिक्त जागांसाठी वैद्यकीय प्रवेशाची तिसरी यादी गुरुवारी रात्री उशिरा जाहीर झाली. चुकीची कागदपत्रे अपलोड करणारे १७० विद्यार्थी आणि कोणतीही कागदपत्रे अपलोड न करणारे ५० विद्यार्थी अशा २२० विद्यार्थ्यांना वगळून ही यादी जाहीर केली आहे. या यादीतून वगळलेल्या २२० विद्यार्थ्यांवर या आणि यापुढील प्रवेश फेरीत बंदी घातली आहे.
वैद्यकीय प्रवेशाच्या दुसऱ्या यादीनंतर राज्यात एमबीबीएसच्या ७८९ आणि बीडीएसच्या ९७५ मिळून एक हजार ७६४ रिक्त जागा आहेत. यात शासकीय वैद्यकीय महाविद्यालयाच्या एमबीबीएससाठी १६८ तर बीडीएससाठी ६० जागा रिक्त आहेत. तर खासगी वैद्यकीय महाविद्यालयाच्या एमबीबीएससाठी ६२१ आणि बीडीएससाठी ९१५ जागा रिक्त आहेत. तिसऱ्या फेरीत प्रवेशासाठी महाविद्यालय मिळालेल्या विद्यार्थ्यांना ३१ ऑक्टोबर ते ४ नोव्हेंबर २०२५ या कालावधीत प्रत्यक्ष महाविद्यालयात जाऊन प्रवेश घ्यावा लागणार आहे.

चुकीची कागदपत्रे आढळली
वैद्यकीय प्रवेशाच्या तिसऱ्या फेरीत नव्याने अर्ज भरलेल्या १७१ विद्यार्थ्यांनी चुकीची कागदपत्रे अपलोड केली होती. याबाबत सीईटी कक्षाकडे काही तक्रारी आल्या. त्यांची शहानिशा केल्यानंतर १७० विद्यार्थ्यांची कागदपत्रे चुकीची आढळली. त्यांना नोटीस पाठवून मूळ कागदपत्रे अपलोड करण्यास सांगितले. यातील एकाच विद्यार्थ्याने कागदपत्रे अपलोड केली. त्याच्या कागदपत्रांची तपासणी करण्यात आली. उर्वरित १७० विद्यार्थ्यांनी कागदपत्रे अपलोड केली नसल्याने त्यांच्यावर प्रवेश बंदी घातली आहे.
तसेच १०८ विद्यार्थ्यांनी कोणतीही कागदपत्रे अपलोड केली नव्हती. त्यांनादेखील नोटीस पाठवून मूळ कागदपत्रे अपलोड करण्यास सांगितले. यातील ५८ विद्यार्थ्यांनी कागदपत्रे अपलोड केली. उर्वरित ५० विद्यार्थ्यांनी कागदपत्रे अपलोड केली नाहीत. त्यामुळे दोन्ही मिळून २२० विद्यार्थ्यांना वैद्यकीय प्रवेशाच्या या आणि पुढील फेरीसाठी प्रवेश बंदी घातली असल्याची माहिती सीईटी सेलने दिली आहे.