विश्वास पाटील यांच्या हस्ते पुणे बुक फेअरचे उद्‍घाटन

पुणे, ता. ३० ः ‘पुणे बुक फेअर २०२५’चे उद्‍घाटन ज्येष्ठ साहित्यिक व ९९ व्या अखिल भारतीय मराठी साहित्य संमेलनाचे नियोजित अध्यक्ष विश्‍वास पाटील यांच्या हस्ते गुरुवारी झाले. आपटे रस्त्यावरील सेंट्रल पार्क येथे हे प्रदर्शन भरविण्यात आले आहे.
याप्रसंगी पुणे अतिरिक्त विभागीय आयुक्त स्वाती देशमुख, महाराष्ट्र साहित्य परिषदेचे कार्याध्यक्ष प्रा. मिलिंद जोशी, प्रमुख कार्यवाह सुनीताराजे पवार, प्रसारभारतीचे सहाय्यक संचालक इंद्रजित बागल, सूर्यदत्त ग्रुप ऑफ इन्स्टिट्यूटचे संस्थापक-अध्यक्ष प्रा. संजय चोरडिया, पुणे बुक फेअरचे आयोजक पी. एन. आर. राजन आदी उपस्थित होते. ‘‘मराठी भाषेमधील व्यवहार मोठा आहे. भविष्यात मराठी शाळा दिसल्या पाहिजेत; तरच मराठी भाषा, ग्रंथालये आणि संस्कृती टिकेल’’, असे पाटील म्हणाले. या प्रदर्शनात देशभरातील नामवंत पुस्तक विक्रेते, वितरक व प्रकाशन संस्थांची विविध विषयांवरील पुस्तके, साप्ताहिके, मासिके उपलब्ध आहेत. हे प्रदर्शन रविवारपर्यंत (ता. २) सकाळी ११ ते सायंकाळी ८ वाजेपर्यंत सेंट्रल पार्क येथे सर्वांसाठी खुले आहे. सूत्रसंचालन शिरीष चिटणीस यांनी केले. वि. दा. पिंगळे यांनी आभार मानले.