कोकणातील ‘दशावतार’ अनुभवण्याची पुणेकरांना संधी

पुणे, ता. ३० ः महाराष्ट्रातील लोकपरंपरेचा महत्त्वाचा भाग असणाऱ्या दशावतार कलेचा अनुभव घेण्याची संधी पुणेकरांना मिळणार आहे. ७ ते ९ नोव्हेंबर या कालावधीत पुण्यात आयोजित दशावतारी महोत्सवात कोकणातील कलाकार दशावतार सादर करणार आहेत. या महोत्सवाला प्रवेश मूल्य आहे.
अभिनेता सिद्धार्थ मेनन प्रस्तुत या महोत्सवात ७ नोव्हेंबरला रात्री ९.३० वाजता टिळक स्मारक मंदिर येथे, ८ नोव्हेंबरला सायंकाळी ७ वाजता पाषाणच्या पुणे इंटरनॅशनल सेंटर येथे आणि ९ नोव्हेंबरला रात्री ८ वाजता एरंडवण्यातील द बॉक्स येथे दशावतारचे खेळ सादर होणार आहेत. सावंतवाडीतील जय हनुमान दशावतार पारंपरिक नाट्य मंडळ हे सर्व खेळ सादर करणार आहे. शरद मोचेमाडकर आणि सुवर्णा मोचेमाडकर यांची ही प्रस्तुती आहे. कोकणच्या समृद्ध भूमीतील सुमारे ८०० वर्षांची परंपरा लाभलेला ‘दशावतार’ हा लोकनाट्य प्रकार आजही कोकणातील गावागावांत सादर केला जातो. मात्र पुण्यात याचे फारसे प्रयोग झालेले नाहीत. ही उणीव भरून काढण्यासाठी या महोत्सवाचे आयोजन करण्यात आले आहे.