विद्यापीठातील प्राध्यापक भरतीला लवकरच गती

पुणे, ता. ४ : सावित्रीबाई फुले पुणे विद्यापीठातील रखडलेल्या प्राध्यापकांच्या जवळपास १११ रिक्त जागांवरील भरतीला लवकरच गती मिळणार आहे. विद्यापीठातील प्राध्यापक भरतीची लवकरच जाहिरात निघणार असून भरतीची प्रक्रिया तत्काळ सुरू होणार असल्याची माहिती विद्यापीठ प्रशासनाने दिली.
छत्रपती संभाजीनगर येथील डॉ. बाबासाहेब आंबेडकर मराठवाडा विद्यापीठातील पदभरतीची जाहिरात प्रसिद्ध झाल्यानंतर राज्यातील अन्य सार्वजनिक विद्यापीठांमधील पदभरतीच्या प्रक्रियेला गती मिळाली आहे. त्यामुळे मंगळवारचा संपूर्ण दिवस राज्यातील विविध विद्यापीठांमध्ये एकमेकांशी संपर्क साधून प्राध्यापक पदभरतीची जाहिरात प्रसिद्ध करण्यासाठी आवश्यक प्रक्रिया राबविण्यात गेला. यावर ठोस निर्णय घेण्याच्या दृष्टीने पुणे विद्यापीठ प्रशासनातदेखील मंगळवारी रात्री उशिरापर्यंत हालचाली सुरू होत्या. गेल्या अनेक वर्षांपासून पुणे विद्यापीठातील प्राध्यापकांच्या जागा रिक्त आहेत. परिणामी विद्यापीठातील शैक्षणिक आणि संशोधन कामात अडथळे येत होते. तसेच शैक्षणिक व्यवस्था देखील कोलमडण्याच्या स्थितीत होती. देश पातळीवरील राष्ट्रीय संस्थात्मक क्रमवारी आराखड्यातील (एनआयआरएफ) क्रमवारीत विद्यापीठाच्या घसरलेल्या क्रमवारीला प्राध्यापकांच्या रिक्त जागा हे देखील एक महत्त्वाचे कारण होते.
विद्यापीठामध्ये विद्यार्थ्यांना शिकविण्यासाठी प्राध्यापकच उपलब्ध नसतील, तर विद्यापीठाचे काय होणार, असा प्रश्न उपस्थित होत होता. त्यानंतर प्राध्यापक भरती प्रक्रियेला होणाऱ्या विलंबामुळे अनेक ताशेरे ओढले जात होते. परंतु, आता लवकरच विद्यापीठातील जवळपास १११ प्राध्यापकांच्या भरतीच्या प्रक्रियेला सुरवात होणार असल्याचे विद्यापीठ प्रशासनाकडून सांगण्यात आले.