बालकुमार साहित्य संमेलन गुरुवारपासून

पुणे, ता. १० ः जिल्हा परिषदेच्या शाळेत शिक्षण घेत असलेल्या विद्यार्थ्यांच्‍या सर्जनशीलतेला, अभिव्‍यक्‍तीला आणि साहित्‍य जाणिवेला प्रोत्‍साहन देण्यासाठी पहिल्यांदाच पुण्यात बालकुमार साहित्य संमेलनाचे आयोजन जिल्हा परिषदेने केले आहे. हे संमेलन बालगंधर्व रंगमंदिरात गुरुवारी (ता. १३) आणि शुक्रवारी (ता. १४) होणार असल्याचे जिल्हा परिषदेचे मुख्य कार्यकारी अधिकारी गजानन पाटील यांनी सोमवारी पत्रकार परिषदेत दिली.
संमेलनात जिल्‍ह्यातील विद्यार्थी आणि शिक्षकांचा सहभाग असेल, त्याचबरोबर संमेलनात बाल साहित्यिकांकडून मुलांना बौद्धिक मेजवानी मिळणार आहे. यात मुलांसाठी पुस्‍तकांचे दालने असून, पुस्‍तक प्रदर्शनही असणार आहे. बालकवी आणि कथाकथन सत्रासाठी आयोजित स्पर्धांमध्ये जिल्हा परिषदेच्या शाळेतील सुमारे एक हजार विद्यार्थ्यांनी सहभाग घेतला, त्यातून ३१० विद्यार्थ्यांची जिल्हास्तरावर निवड झाली आणि त्यातील ३० उत्कृष्ट विद्यार्थ्यांची अंतिम निवड केली असल्याचेही पाटील यांनी सांगितले. तसेच जिल्‍ह्यातील ३८० मुलांनी आणि तीनशे शिक्षकांनी पुस्‍तके लिहिले आहेत. त्यांचा प्रातिनिधिक स्वरूपात सन्मान केला जाणार आहे. जिल्हा परिषद आणि अमरेंद्र भास्कर मराठी बालकुमार साहित्य संस्था यांच्या संयुक्त विद्यमाने संमेलन होत आहे. या संमेलनासाठी कथाकथन, कथावाचन आणि हस्ताक्षर स्पर्धा तालुका स्तरावर जिल्हा परिषदेच्या शाळांमध्ये घेण्यात आल्‍या आहेत. विजेत्‍या विद्यार्थ्यांचा गौरव संमेलनात करण्यात येणार आहे. त्याचबरोबर शनिवारवाडा ते बालगंधर्व रंगमंदिर या मार्गावर ग्रंथ दिंडीचे ही आयोजन करण्यात आल्याचे पाटील यांनी सांगितले.