परदेशी मराठी बांधवांसाठी कला आनंदोत्सवाचे आयोजन

पुणे, ता. १० : येथील आभाळाखालची शाळा फाउंडेशनतर्फे परदेशातील मराठी बांधवांसाठी ‘कला आनंदोत्सव’ या विशेष सोहळ्याचे आयोजन करण्यात आले आहे. पुढील वर्षी मार्चमध्ये हा कार्यक्रम होणार असून यात जगभर विखुरलेल्या मराठी कलावंताचा सन्मान केला जाणार आहे. याअंतर्गत गायन, वादन, नृत्य, नाट्य, एकपात्री प्रयोग, नक्कल आदी विविध स्पर्धा होणार आहेत. यात वय वर्षे पाचपासून ६० वर्षांपर्यंतचे कलावंत सहभागी होऊ शकतात. अधिक माहितीसाठी Aabhalakhalchishala@gmail.com या ई-मेलवर संपर्क साधावा, असे आवाहन फाउंडेशनने केले आहे.

तीनशे बालकलाकारांचा
‘जल्लोष लोककलेचा’
पुणे, ता. १० : येथीस बालरंगभूमी परिषदेतर्फे बालकलाकारांच्या कलागुणांना व्यासपीठ देण्यासाठी शुक्रवारी (ता. ११) ‘जल्लोष लोककलेचा’ कार्यक्रमाचे आयोजन केले आहे. नगर रस्त्यावरील श्री संत तुकाराम महाराज माध्यमिक विद्यालयात सकाळी १० पासून या कार्यक्रमाला सुरुवात होणार आहे. या अंतर्गत नृत्य, गायन आणि वादन प्रकारातील स्पर्धा होणार असून ३०० बालकलाकार या स्पर्धांमध्ये सादरीकरण करणार आहेत. स्पर्धेनंतर लगेचच पारितोषिक वितरण होईल.