करुणा मुंडे यांचा पक्ष निवडणुका लढवणार

पुणे, ता. १० ः स्वराज्य शक्ती सेना हा माझा पक्ष असून, महाराष्ट्रातील सर्व स्थानिक स्वराज्य संस्था निवडणुका आम्ही लढवणार आहोत. राज्यातील शेतकरी, उद्योगपती, शिक्षक सगळे त्रस्त आहेत. प्रस्थापित पक्ष केवळ तोडा- फोडीचे राजकारण करत आहेत. त्यामुळे मतदारांनी आता जुन्या ऐवजी नव्या लोकांना संधी दिली पाहिजे, असे आवाहन करुणा मुंडे यांनी केले.
पुण्यात पत्रकार भवन येथे आयोजित पत्रकार परिषदेत करुणा मुंडे बोलत होत्या. त्या म्हणाल्या, ‘‘पुण्यात एका तरुण मुलाने १८०० कोटी रुपयांची जमीन विकत घेतली, पण त्याला कोणीच काही विचारत नाही. ही जमीन हडपलेली आहे. सगळे मिळून खात आहेत. पुण्यात अनेक समस्या आहेत. मात्र, सगळे गप्प आहेत पण मी शांत बसू शकत नाही. त्यामुळेच निवडणुका लढविण्याचा निर्णय घेतला आहे. रूपाली पाटील ठोंबरे यांना मी कधीही महिलांसाठी लढलेले पाहिले नाही. त्यामुळे मी त्यांना माझ्या पक्षात कशाला घेऊ.’’