पुण्यातही ‘हाय अलर्ट’

पुणे, ता. १० : दिल्लीतील बॉम्बस्फोटाच्या घटनेनंतर पुणे शहरातही सुरक्षा यंत्रणांकडून ‘हाय अलर्ट’ जाहीर करण्यात आला आहे. शहरातील महत्त्वाच्या आणि संवेदनशील ठिकाणांवर पोलिसांकडून कडक बंदोबस्त तैनात करण्यात येत असून, संशयास्पद हालचालींवर विशेष लक्ष ठेवले जात आहे.
दिल्लीतील घटनेनंतर महाराष्ट्र पोलिस मुख्यालयाकडून सर्व जिल्ह्यांना सतर्कतेचा इशारा देण्यात आला आहे. पोलिस आयुक्त अमितेश कुमार यांनीही सर्व पोलिस ठाण्यांना सतर्क राहण्याच्या सूचना दिल्या आहेत. त्यानुसार शहरातील रेल्वे स्टेशन, बसस्थानके, विमानतळ, मॉल्स, चित्रपटगृह, धार्मिकस्थळे आणि गर्दीच्या भागांमध्ये पोलिस गस्त वाढवण्यात आली आहे.
रेल्वे स्टेशन परिसरात बॅग तपासणी, बसस्थानकात तपासणी मोहीम सुरू आहे. गुप्तचर यंत्रणांकडून सोशल मीडियावरील हालचालींवर देखरेख ठेवण्यात येत आहे. शहरातील महत्त्वाच्या ठिकाणी सीसीटीव्हीच्या माध्यमातून २४ तास निरीक्षण सुरू असून, संशयास्पद व्यक्तींवर विशेष लक्ष केंद्रित करण्यात आले आहे, अशी माहिती विशेष शाखेचे पोलिस उपायुक्त संदीप भाजीभाकरे यांनी दिली.
दरम्यान, ‘कोणतीही संशयास्पद हालचाल, बॅग, वाहन किंवा वस्तू आढळून आल्यास नागरिकांनी त्वरित पोलिसांना माहिती द्यावी,’ असे आवाहन पुणे पोलिसांनी केले आहे.