पुणे शहर परिसरातील गारठा वाढला - किमान तापमान १२.७ अंश सेल्सिअसवर

पुणे, ता. १४ : शहरात गेल्या दोन दिवसांपासून स्थिर असलेल्या तापमानात शुक्रवारी (ता. १४) आणखी घट झाली आहे. परिणामी थंडीचा कडाका वाढला आहे. पुढील चार दिवसांत किमान आणि कमाल तापमानात आणखी घट होण्याची शक्यता भारतीय हवामानशास्त्र विभागाने वर्तवली आहे. त्यामुळे थंडीत आणखी वाढ होणार आहे.

शहर आणि परिसरात शुक्रवारी किमान तापमान १२.७ अंश सेल्सिअस इतके नीचांकी आणि कमाल तापमान ३० अंश सेल्सिअस नोंदविण्यात आले, तर पाषाण परिसरामध्ये १२.३ सेल्सिअस इतके नीचांकी नोंदविण्यात आले. किमान तापमानात घट झाल्यामुळे गारवा वाढला असून, पहाटे, तसेच रात्रीच्या वेळी थंडीची तीव्रता अधिक जाणवत आहे. रस्त्यांवर नागरिक स्वेटर, जॅकेट, मफलर अशा उबदार कपड्यांमध्ये वावरताना दिसत आहेत. दिवसाच्या वेळी सूर्यप्रकाश असला तरी हवेत गारवा टिकून असल्याने थंडीची जाणीव कायम राहते.

भारतीय हवामानशास्त्र विभागाने दिलेल्या माहितीनुसार, उत्तर भारतातून येणाऱ्या थंड वाऱ्याचा प्रभाव आणि स्थानिक हवामानातील बदलामुळे पुण्यातील थंडी काही दिवस कायम राहण्याची शक्यता आहे.

पुणे आणि परिसरामध्ये शनिवारी (ता. १५) कमाल आणि किमान तापमानात किंचित घट होण्याची शक्यता असून, कमाल तापमान ३० अंश सेल्सिअस, तर किमान तापमान १२ अंश सेल्सिअस इतके नोंदविण्यात येणार आहे. आकाश मुख्यतः निरभ्र राहण्याची शक्यता आहे, तर रविवारपासून (ता. १६) कमाल आणि किमान तापमानात आणखी घट होण्याची शक्यता आहे. कमाल तापमान २९ अंश सेल्सिअस, तर किमान तापमान ११ अंश सेल्सिअसपर्यंत नोंदविण्यात येणार आहे. आकाश मुख्यतः निरभ्र राहण्याची शक्यता हवामानशास्त्र विभागाने वर्तविली आहे.