सुनेला पेटवून देणाऱ्या सासू-नणंदला जन्मठेप

पुणे, ता. १८ ः स्वयंपाक करण्यावरून झालेल्या भांडणातून सुनेला रॉकेल टाकून पेटवून देत जिवे मारणाऱ्या सासू व नणंदला न्यायालयाने जन्मठेप आणि २५ हजार रुपये दंडाची शिक्षा सुनावली. मृत्युपूर्वी सुनेने दिलेला जबाब आणि वैद्यकीय पुराव्यांवरून दोन्ही आरोपींनी तिचा खून केल्याचे सरकार पक्षाने सिद्ध केले. त्या आधारे अतिरिक्त सत्र न्यायाधीश प्रभाकर जाधव यांनी हा निकाल दिला.
ममता विजय चव्हाण (वय ४८, रा. मंगळवार पेठ, श्रमिकनगर) आणि रिटा ऊर्फ गौरी संतोष वाल्मिके (वय ३४, रा. जयजवाननगर) अशी शिक्षा झालेल्या आरोपींची नावे आहेत. त्यांनी दीपाली अमित चव्हाण (वय २८) हिच्या अंगावर रॉकेल ओतून तिला पेटवून दिले. ही घटना १ नोव्हेंबर २०१३ रोजी सायंकाळी पाचच्या सुमारास श्रमिकनगर येथे घडली. गंभीररीत्या भाजलेल्या दीपालीला पती अमितने ससून रुग्णालयात नेले. उपचारांदरम्यान दीपालीचा ४ नोव्हेंबर २०१३ मृत्यू झाला होता. या प्रकरणी
गाडीतळ पोलिस चौकीचे तत्कालीन सहायक निरीक्षक परशुराम शिंदे यांनी डॉक्टरांच्या उपस्थितीत तिचा जबाब नोंदविला. त्यानंतर पोलिसांनी सासू व नणंदला अटक केली. त्यामुळे आरोपींविरोधात खुनाचे कलम जोडत तपास अधिकाऱ्यांनी न्यायालयात आरोपपत्र दाखल केले.
सरकार पक्षातर्फे अतिरिक्त सरकारी वकील नामदेव तरळगट्टी यांनी बाजू मांडली. त्यांनी आठ साक्षीदार तपासले, तर बचाव पक्षातर्फे दोन साक्षीदार तपासण्यात आले. सून कायम भांडत असे, तसेच तिने यापूर्वी एक-दोन वेळा आत्महत्येचा प्रयत्न केला होता. घटनेच्या दिवशीही तिने भांडण केले. मात्र, आपण घरी नव्हतो, असा बचाव आरोपींनी केला. मात्र, पीडितेने सजगपणे मृत्युपूर्व जबाब दिला असून जबाब नोंदविणारे सहायक निरीक्षक आणि उपस्थित असलेल्या डॉक्टरांनी त्याला दुजोरा दिला आहे. त्यामुळे मृत्युपूर्व जबाब आणि तक्रार ही संशयापलिकडे सिद्ध होते असा निष्कर्ष काढून न्यायालयाने हा निकाल दिला