कात्रज डेअरीजवळ अपघातात दुचाकीस्वाराचा मृत्यू

पुणे, ता. २५ : भरधाव रुग्णवाहिकेची धडक बसल्याने दुचाकीस्वाराचा मृत्यू झाला. हा अपघात पुणे-सातारा रस्त्यावरील कात्रज डेअरीजवळ घडली. या अपघातानंतर रुग्णवाहिका चालक पसार झाला आहे.
पांडुरंग वामन पंधेरे (वय ४८, रा. सिद्धीविनायक सोसायटी, दत्तनगर, आंबेगाव) असे मृत्युमुखी पडलेल्या व्यक्तीचे नाव आहे. याबाबत त्यांचा मुलगा रोहित पंधेरे यांनी भारती विद्यापीठ पोलिस ठाण्यात फिर्याद दिली आहे. त्यावरून रुग्णवाहिका चालक अमर शिंदे याच्यावर गुन्हा दाखल करण्यात आला आहे. पोलिसांनी दिलेल्या माहितीनुसार, दुचाकीस्वार पांडुरंग पंधेरे हे सोमवारी दुपारी सव्वातीन वाजता घरी निघाले होते. ते कात्रज डेअरीजवळ आल्यानंतर त्यांना भरधाव रुग्णवाहिकेची धडक बसली. या अपघातात गंभीर जखमी झाल्याने पंधेरे यांचा मृत्यू झाला. या घटनेनंतर रुग्णवाहिका चालक पसार झाला असून त्याचा शोध घेण्यात येत आहे.