एमआयटी विद्यापीठात बॅटरी संशोधन केंद्र सुरु

पुणे, ता. १३ : शाश्वत ऊर्जा उपाययोजनेच्या दिशेने महत्त्वपूर्ण पाऊल टाकत एमआयटी विश्वशांती विद्यापीठातर्फे लिथियम आयन (लि-आयन) आणि सोडियम आयन (नॅ-आयन) तंत्रज्ञानावर लक्ष केंद्रित करणारे देशातील पहिले खासगी अत्याधुनिक बॅटरी फॅब्रिकेशन व संशोधन केंद्र सुरू करण्यात आले आहे.
संपूर्ण बॅटरी विकसित करण्याच्या दृष्टीने या केंद्राची रचना केली आहे. या ठिकाणी ॲक्टिव्ह मटेरिअल सिन्थेसिसपासून ते कॉइन सेल फॅब्रिकेशन व इलेक्ट्रोकेमिकल परफॉर्मन्स मूल्यमापनापर्यंत सर्व क्षमता आहेत. या केंद्रात लिथियम आयन बॅटऱ्यांसाठी हाय प्युरिटी सॉल्व्हंट्स आणि इलेक्ट्रोलाइट्सचे सिंथेसिस सुरू केले आहे. देशातील बॅटरी उत्पादकांना उच्च गुणवत्तेचा कच्चा माल उपलब्ध करून देण्यासाठी हे केंद्र महत्त्वाचे पाऊल ठरत आहे.
याप्रसंगी विद्यापीठातील सेंटर ऑफ एक्सलन्स इन मटेरिअल्स सायन्सचे संचालक प्रा. डॉ. भरत काळे म्हणाले, ‘‘या उपक्रमामुळे देशाच्या ऊर्जा स्वावलंबनाच्या उद्दिष्टांना बळकटी मिळाली आहे. या केंद्राच्या माध्यमातून शैक्षणिक व औद्योगिक सहयोगाला चालना देण्यात येत आहे, त्याचबरोबर हे केंद्र भावी तज्ज्ञ घडविण्यासाठी महत्त्वाचे प्रशिक्षण व्यासपीठ म्हणूनही काम करेल. हा उपक्रम ‘आत्मनिर्भर भारत’ आणि ‘मेक इन इंडिया’सारख्या राष्ट्रीय अभियानाशी सुसंगत असून देशाच्या ऊर्जा स्वावलंबनामध्ये अर्थपूर्ण योगदान देण्याचे काम करेल.’’