वासंतिक कीर्तन प्रशिक्षण शिबिराचा समारोप

पुणे, ता. १४ : ‘सकाळ माध्यम समूहा’तील ‘सकाळ सोशल फाउंडेशन’, श्रीहरि कीर्तनोत्तेजक सभा आणि श्री नारद विद्या मंदिर यांच्यातर्फे घेण्यात आलेल्या वासंतिक कीर्तन प्रशिक्षण वर्गाचा समारोप नुकताच उत्साहात झाला. यंदाच्या प्रशिक्षण वर्गाला राज्यभरातून उत्स्फूर्त प्रतिसाद मिळाला असून, एकशे पन्नास विद्यार्थ्यांनी प्रशिक्षण पूर्ण केले आहे.
समारोप कार्यक्रमात बाल कीर्तन वर्ग ते प्रशिक्षण कीर्तन वर्ग अशा सहा कीर्तन वर्गांतील गुणवंत प्रशिक्षणार्थींचा मान्यवरांच्या हस्ते गौरव करण्यात आला. यामध्ये बालवर्ग : अनिरुद्ध कुलकर्णी, भूमी पाटील, मीरा माळी व सर्विन पांडव. प्रथम वर्ष छोटा गट : मानस जोशी, कौमुदी मराठे व श्रेयस कुलकर्णी. प्रथम वर्ष मोठा गट : तुषार माळी, मोहिनी चंद्रचूड, अमृता जोशी, राजेंद्र दीक्षित. द्वितीय वर्ष : मंगेश पाठक, सई क्षीरसागर व राजश्री सूर्यवंशी. तृतीय वर्ष : अथर्व गुळवणी, ऋचा प्रभुणे व वैदेही देशमुख. चतुर्थ वर्ष : ओवी काळे, मंजुश्री वनारसे, स्मिता मुळे व वेदवती कोगेकर. प्रशिक्षण वर्ग : अक्षता पाध्ये व मीनाक्षी कळमकर आदींचा समावेश होता.
याप्रसंगी संस्थेच्या वतीने देण्यात येणारा पहिला ‘कीर्तन शिक्षक’ पुरस्कार ज्येष्ठ कीर्तनकार कमल पराडकर यांना प्रदान करण्यात आला. या प्रसंगी श्रीहरि कीर्तनोत्तेजक सभा संस्थेचे अध्यक्ष रामचंद्र भिडे, उपाध्यक्ष जयंत गोसावी, कार्याध्यक्षा डॉ. नंदिनी पाटील, सचिव जयश्री देशपांडे, प्रेमा कुलकर्णी, चंद्रशेखर ब्रह्मे, भूपेंद्र दोशी, राजेंद्र ठाकूर देसाई, गौरव पटवर्धन, नंदकिशोर राठी आणि वासंतिक वर्गाला अध्यापन करणारे शिक्षक उपस्थित होते.दरवर्षी उन्हाळी सुट्टीनिमित्त आठ ते वय वर्ष ऐंशी वयोगटातील नागरिकांसाठी वासंतिक कीर्तन प्रशिक्षण शिबिराचे आयोजन केले जाते. उपक्रमाला ५२ वर्षे पूर्ण झाली आहेत. सूत्रसंचालन जयश्री देशपांडे यांनी केले. प्रेमा कुलकर्णी यांनी आभार मानले.