कात्रज-किवळे बाह्यवळण मार्गावर जड वाहनांना मर्यादा

पुणे, ता. ८ : हिंजवडी, किवळे आणि आसपासच्या आयटी व औद्योगिक पट्ट्यात वाढत्या वाहतूक कोंडीवर नियंत्रण मिळवण्यासाठी पुणे-बंगळूर महामार्गावरील कात्रज-किवळे बाह्यवळण मार्गावरून जड वाहनांना ठराविक वेळेत बंदी लागू करण्यात आली आहे. ही बंदी १५ ऑक्टोबरपासून पुढील आदेशापर्यंत लागू राहणार आहे, अशी माहिती शहर वाहतूक शाखेचे पोलिस उपायुक्त हिंमत जाधव यांनी दिली.
या निर्णयानुसार, सकाळी ८ ते ११ या वेळेत कात्रजकडून किवळेच्या दिशेने जाणाऱ्या लेनवर तसेच, सायंकाळी ५ ते ९ या वेळेत किवळेकडून कात्रजच्या दिशेने जाणाऱ्या लेनवर जड आणि अवजड वाहनांना वाहतुकीस मनाई करण्यात आली आहे. मल्टी ॲक्सल ट्रक, ट्रेलर्स, कंटेनर्स, डंपर, टॅक्टर, रोड रोलर, जेसीबी अशा जड व संथगतीने चालणाऱ्या वाहनांना या वेळेत वाहतुकीस मनाई असेल. अत्यावश्यक सेवेतील वाहनांना बंदीपासून सवलत राहील.
हिंजवडी आयटी पार्क, पिंपरी-चिंचवड, नऱ्हे, किवळे आणि परिसरात वाढलेल्या औद्योगीकरण आणि नागरीकरणामुळे वाहनांची संख्या मोठ्या प्रमाणात वाढली आहे. यामुळे दररोज मोठ्या प्रमाणात वाहतूक कोंडी, अपघात होत आहेत. या पार्श्वभूमीवर पोलिस आणि जिल्हा प्रशासनाच्या संयुक्त बैठकीनंतर हा निर्णय घेण्यात आला. जिल्हाधिकारी यांच्या अधिसूचनेनुसार हे नियम काटेकोरपणे लागू राहतील. आदेशाचे उल्लंघन करणाऱ्या वाहनचालकांवर कायदेशीर कारवाई करण्यात येईल, असा इशारा प्रशासनाने दिला आहे.

असा आहे आदेश
- सातारा, सांगली, कोल्हापूरकडून येणारी अवजड वाहने शिंदेवाडी टोल नाक्याच्या पुढे येणार नाहीत.
- नवी मुंबई, रायगड, ठाणेकडून येणारी वाहने उर्से टोलनाक्याच्या पुढे आणि वडगाव फाट्याच्या पुढे प्रवेश करणार नाहीत.