तरुणाकडून वाघोलीत २२ लाखांची अफू जप्त

पुणे, ता. १२ : राजस्थानमधील एका तरुणाला अमलीपदार्थ विरोधी पथकाने वाघोली परिसरात सापळा रचून अटक केली. त्याच्याकडून २२ लाख २४ हजार रुपयांची एक किलो ११२ ग्रॅम अफू आणि मोबाईल जप्त केला.
तुलसीदास किसनदास वैष्णव (वय ३०, रा. वरणी, ता. वल्लभनगर, जि. उदयपूर, राजस्थान) असे अटक केलेल्याचे नाव आहे. लोहगाव-वाघोली रस्त्यावरील एका सोसायटीसमोर पिशवी घेऊन एक संशयित व्यक्ती थांबल्याची माहिती गुन्हे शाखेच्या अमलीपदार्थ विरोधी पथकाला मिळाली. पोलिसांनी तेथे सापळा लावला. पोलिसांना पाहताच वैष्णव पळून जाण्याचा प्रयत्न करीत होता. मात्र, पोलिसांनी त्याची झडती घेतली असता त्याच्याकडे पिशवीत एक किलो ११२ ग्रॅम अफू आढळून आली. आरोपी वैष्णवने अफू कोठून आणली आणि कोणाला विक्री करणार होता, याबाबत पोलिसांचा तपास सुरू आहे. पोलिस उपायुक्त निखिल पिंगळे, सहाय्यक आयुक्त विजय कुंभार यांच्या मार्गदर्शनाखाली पोलिस निरीक्षक प्रशांत अन्नछत्रे, पोलिस अंमलदार सचिन माळवे, विशाल दळवी, मारुती पारधी, नागनाथ राख, संदीप शिर्के यांच्या पथकाने ही कारवाई केली.