सफाई कर्मचाऱ्यांच्या समस्या तातडीने सोडवा : शेरसिंग डागोर

पुणे, ता. ८ : ‘‘हाताने मैला उचलणाऱ्या सफाई कामगारांच्या नियुक्तीस प्रतिबंध घालणे व त्यांच्या पुनर्वसनाबाबतच्या कायद्याची प्रभावी अंमलबजावणी व्हावी, तसेच सफाई कर्मचाऱ्यांच्या विविध समस्या तातडीने सोडवाव्यात,’’ अशा सूचना राज्य सफाई कर्मचारी आयोगाचे अध्यक्ष शेरसिंग डागोर यांनी दिल्या.
हाताने मैला उचलणाऱ्या सफाई कामगारांच्या नियुक्तीस प्रतिबंध घालणे व त्यांचे पुनर्वसन करण्याबाबत अधिनियम २०१३ च्या अंमलबजावणीच्या अनुषंगाने जिल्हाधिकारी कार्यालय येथे आढावा बैठकीचे आयोजन करण्यात आले होते. त्यावेळी ते बोलत होते. या वेळी पुणे महापालिकेचे अतिरिक्त आयुक्त पी. प्रदीप, बार्टीचे महासंचालक डॉ. सुनील वारे, निवासी उपजिल्हाधिकारी ज्योती कदम, जिल्हा परिषदेचे व समाजकल्याण विभागाचे अधिकारी, ससून रुग्णालय, जिल्हा रुग्णालय, तसेच पिंपरी-चिंचवड महापालिकेचे प्रतिनिधी उपस्थित होते.
या बैठकीत सफाई कर्मचाऱ्यांच्या समस्या, पुनर्वसन, कायद्याची अंमलबजावणी आणि त्यांच्या कल्याणासाठीच्या उपाययोजना यांचा आढावा घेण्यात आला. डागोर म्हणाले, ‘‘बार्टीने पुणे आणि पिंपरी-चिंचवड महापालिकेसाठी काढलेली परिपत्रके संपूर्ण राज्यासाठी लागू करावीत. ज्यामुळे सर्व जिल्ह्यांतील सफाई कर्मचाऱ्यांना त्याचा लाभ मिळू शकेल. तसेच सार्वजनिक बांधकाम विभागाने लाड-पागे समितीच्या शिफारशींनुसार कर्मचाऱ्यांची नियुक्ती करावी.’’
‘‘शासनाच्या योजनांचा लाभ थेट सफाई कर्मचाऱ्यांपर्यंत पोहोचविण्यासाठी जिल्हाधिकाऱ्यांच्या अध्यक्षतेखाली दर महिन्याला समितीची बैठक घेण्यात यावी,’’ असेही डागोर यांनी स्पष्ट केले. तर कदम म्हणाल्या, ‘‘सफाई कर्मचाऱ्यांच्या तक्रारी आणि अर्जांवर कार्यवाही करून अहवाल सादर केला जाईल. दर महिन्याला नियमित बैठक घेऊन त्यांच्या समस्यांवर मार्ग काढण्यात येईल.’’