‘एफयुईएल’तर्फे १०० विद्यार्थिनींना उद्या शिष्यवृत्तीचे वाटप

पुणे, ता. ८ : गरजू आणि गुणवंत विद्यार्थिनींसाठी ‘युनियन फॉर एनर्जायझिंग लाइव्हस्’ (एफयूईएल) या सामाजिक संस्थेतर्फे ‘हुनर की खोज’ या उपक्रमांतर्गत सीएसआर शिष्यवृत्तीचे वितरण करण्यात येणार आहे. रविवारी (ता. १०) भूगाव येथील एफयूईएल कॅम्पस, फॉरेस्ट ट्रेल्स टाऊनशिप येथे सायंकाळी चार वाजता उच्च व तंत्र शिक्षण मंत्री चंद्रकांत पाटील यांच्या हस्ते १०० विद्यार्थिनींना ही शिष्यवृत्ती प्रदान केली जाणार आहे.
‘हुनर की खोज’ या उपक्रमाअंतर्गत विद्यार्थ्यांना मोफत शिक्षण, इंटर्नशिप, नोकरीच्या संधी, तसेच कृत्रिम बुद्धिमत्ता (एआय), डेटा व्यवस्थापन, संवाद कौशल्य, मायक्रोसॉफ्ट एक्सेल यांसारख्या आधुनिक कौशल्यांचे प्रशिक्षण दिले जाते. तसेच उद्योगभेटी, प्लेसमेंट ड्राइव्ह आदी संधीही संस्थेच्या वतीने उपलब्ध करून दिल्या जातात. या सीएसआर शिष्यवृत्तीनंतर, पात्र विद्यार्थिनींना एफयूईएल कॉलेज, भूगाव येथे पदवी व पदव्युत्तर अभ्यासक्रमांसाठी मोफत शिक्षणाची संधीदेखील दिली जाणार असल्याचे संस्थेने सांगितले आहे.
संस्थेच्या उल्लेखनीय कार्याची आंतरराष्ट्रीय स्तरावरही दखल घेण्यात आली असून, नुकतेच दावोस येथे झालेल्या वर्ल्ड इकॉनॉमिक फोरम २०२५ कार्यक्रमात ‘एफयूईएल’ आणि महाराष्ट्र सरकार यांच्यात सामंजस्य करार करण्यात आला आहे.