सॅलिसबरी पार्कमध्ये सोनसाखळी हिसकावली

पुणे, ता. ८ ः सॅलिसबरी पार्क परिसरात चालत जाणाऱ्या एका ज्येष्ठ नागरिकाला दुचाकीस्वारांनी धक्का देऊन त्‍यांच्‍या गळ्यातील अंदाजे ३० हजार रुपये किमतीची सोनसाखळी लंपास केल्याची घटना घडली. या संदर्भात स्वारगेट पोलिस ठाण्यात गुन्हा दाखल करण्यात आला आहे. फिर्यादी ज्येष्ठ नागरिक सॅलिसबरी पार्क येथील एका सोसायटीत राहत असून ते बुधवारी रात्री आठ वाजताच्या सुमारास एलआयसी कॉलनी भागातून जात असताना दोन दुचाकीस्वारांनी त्यांना जोरात धक्का दिला आणि त्यांच्या गळ्यातील सोनसाखळी हिसकावून पळ काढला. घाबरलेल्या ज्येष्ठाने पोलिस ठाण्यात तक्रार नोंदवली. पोलिसांनी घटनास्थळी भेट देऊन सीसीटीव्ही चित्रीकरण तपासले असून, ते आरोपींचा शोध घेत आहेत.

वारजे माळवाडीतील घरफोडी
पुणे, ता. ८ ः वारजे भागातील आदित्य गार्डन सिटी या गृहप्रकल्पातील एका बंद सदनिकेचे कुलूप तोडून चोरट्यांनी सुमारे चार लाख ३० हजार रुपयांचे सोन्याचे दागिने लांबविल्याची घटना समोर आली आहे. यातील फिर्यादी ज्येष्ठ नागरिक हे ३ ऑगस्ट रोजी सायंकाळी सहाच्या सुमारास घर कुलूप लावून बाहेर गेले होते. या दरम्यान चोरट्यांनी सदनिकेचे कुलूप फोडून घरातील कपाट उचकटले आणि त्यातील दागिने घेऊन पसार झाले. घटनेनंतर वारजे माळवाडी पोलिस ठाण्यात गुन्हा दाखल करण्यात आला आहे.