आगामी निवडणुकीवर बहिष्कार शेतकरी हक्क परिषदेत बच्चू कडू यांचा इशारा

पुणे, ता. ८ : सरकारला तुमच्या शेतकरी आंदोलनाची भीती का वाटत नाही, याच्या मुळाशी गेले पाहिजे. सरकारला आंदोलनापेक्षा मताची भीती वाटते. शेतकरी विभागला जाऊ नये, यासाठी येत्या स्थानिक स्वराज्य संस्थांच्या निवडणुकीत प्रहार पक्ष बहिष्कार टाकेल, असा इशारा प्रहार जनशक्ती पक्षाचे अध्यक्ष, माजी राज्यमंत्री बच्चू कडू यांनी शुक्रवारी दिला.
पुण्यात आयोजित करण्यात आलेल्या शेतकरी हक्क परिषदेत ते बोलत होते. निवडणुकीवर बहिष्कार घालण्याचा बच्चू कडू यांच्या घोषणेवर राजू शेट्टी यांनी मात्र ‘विचारपूर्वक विचार करूनच निर्णय मांडू,’ असे स्पष्ट केले. त्यानंतर कडू यांनी आपली वैयक्तिक भूमिका असल्याचे स्पष्ट केले.
राजकारणामुळे आपले नुकसान झाल्याची खंत व्यक्त करत कडू म्हणाले, ‘‘शेतकऱ्यांच्या मुद्द्यापेक्षा जाती, धर्माच्या मुद्द्यावर लोक लवकर एकत्र येतात. निवडणुकांपूर्वी महायुतीने शेतकऱ्यांचे कर्ज माफ करू, अशी घोषणा केली होती. मात्र, ती अद्यापही अमलात आणली नाही. शेतकऱ्यांनी यासाठी आंदोलन करू नये, यासाठी सरकार प्रयत्नशील आहे. जिल्हा परिषदेच्या निवडणुकीत जात, धर्मावरच प्रचार केला जाणार आहे. शेतकऱ्यांच्या प्रश्‍नांवर कोणत्याही पक्षाला सत्ताधारी पक्षाला निवडणूक लढवायची नाही. त्यामुळे खेड्यापाड्यातील तरुणांना मतांसाठी तोडले जाईल. त्याला शेतकरी बळी पडतील. सध्याचे राजकारण वाहत गेले असून, शेतकऱ्यांच्या प्रश्‍नांवर एकत्रित होण्याची गरज आहे. राजकारणातील नेतेमंडळींना मतदाराची भीती कायम असते. त्यामुळे बहिष्काराचे ब्रह्मास्त्र वापरणे आपल्या हाती आहे.’’

‘‘शेतकऱ्यांच्या सर्व संघटना एका मंचावर येऊन शेतकऱ्यांचे प्रश्‍न कायमस्वरूपी सोडविण्यासाठीचा कृती आराखडा तयार करतील. त्यासाठी अधिवेशन घेऊन राज्यव्यापी आंदोलनाची घोषणा केली जाईल. त्यात निवडणुकीवरील बहिष्काराबाबतही चर्चा केली जाईल. शेतकऱ्यांचा सातबारा कोरा करणे, शेतमालाला हमीभाव देणे ही महायुती सरकारची आश्‍वासने हवेत विरली आहेत. त्या पार्श्वभूमीवर व्यापक जनआंदोलन उभारण्याच्या अनुषंगाने या परिषदेत चर्चा करण्यात आली असून, सहमती दर्शविण्यात आली आहे.
राजू शेट्टी, अध्यक्ष, स्वाभिमानी शेतकरी संघटना