टिळक रस्ता विसर्जन मिरवणुकीत यंदा दोनच ढोल-ताशा पथके

टिळक रस्ता विसर्जन मिरवणुकीत यंदा दोनच ढोल-ताशा पथके

Published on

पुणे, ता. ८ ः टिळक रस्त्यावरील विसर्जन मिरवणुकीत यंदा दोन ढोल-ताशा पथके, जेधे चौक व पूरम चौकात ढोल-ताशा व डीजे वाजविण्यास बंदी आणि दुर्घटना टाळण्याठी विक्रेत्यांची मुख्य रस्त्याऐवजी अंतर्गत रस्त्यावर व्यवस्था, अशा उपाययोजनांवर यंदा भर देण्याचा निर्णय पोलिस व गणेशोत्सव मंडळांनी घेतला आहे. या उपाययोजनांद्वारे टिळक रस्त्यावरील विसर्जन मिरवणूक रात्री बारा वाजता संपविण्याचे टिळक रस्ता विसर्जन मिरवणूक समितीने निश्‍चित केले आहे.
टिळक रस्त्यावरील गणेशोत्सव मंडळांनी केलेल्या मागणीनुसार मिरवणूक लवकर संपवावी, म्हणून आवश्‍यक उपाययोजना करण्यासाठी परिमंडळ दोनचे पोलिस उपायुक्त मिलिंद मोहिते व टिळक रोड गणेशोत्सव विसर्जन मिरवणूक समितीच्या सदस्यांनी शुक्रवारी दुपारी विसर्जन मिरवणूक मार्गाची पाहणी केली.
या वेळी स्वारगेट पोलिस ठाण्याचे पोलिस निरीक्षक यशवंत निकम, खडक पोलिस ठाण्याच्या पोलिस निरीक्षक (गुन्हे) शर्मिला सुतार, विश्रामबाग पोलिस ठाण्याचे पोलिस निरीक्षक संतोष पांढरे यांच्यासह साने गुरुजी तरुण मंडळाचे अध्यक्ष धीरज घाटे, सेवा मित्र मंडळाचे अध्यक्ष शिरीष मोहिते, नेहरू तरुण मंडळाचे पुष्कर तुळजापूरकर, दर्शन मित्र मंडळाचे गणेश घोष, सत्यवीर मित्र मंडळाचे उमेश वैद्य, सुभाषनगर माडीवाले कॉलनी मित्र मंडळाचे विनायक धारणे, एकता मित्र मंडळाचे सुरेश ढमाले, शिवदर्शन मित्र मंडळाचे अमित बागूल, अचानक मित्र मंडळाचे ऋषिकेश भुजबळ आदी उपस्थित होते.
टिळक रस्त्यावरील विसर्जन मिरवणुकीत सहभागी होणाऱ्या मंडळांनी एक ते दोन ढोल-ताशा पथके घ्यावीत, त्यामध्ये ३० ढोल असावेत, जेधे चौकातून मिरवणुकीत सहभागी होणाऱ्या मंडळाने पाच तासांत, तर पूरम चौकातून मिरवणुकीत सहभागी होणाऱ्या मंडळाने चार तासांत मिरवणूक संपवावी, मुख्य रस्त्याला जोडणारे अंतर्गत रस्ते बॅरिकेड्‌स टाकून बंद करणे, खाद्यपदार्थ व वस्तू विक्रेत्यांची मुख्य रस्त्याऐवजी अंतर्गत रस्त्यावर व्यवस्था करणे आणि ज्या रस्त्यांचे पास मंडळांकडे आहेत, त्याच रस्त्याने संबंधित मंडळांनी मिरवणुकीत सहभागी व्हावे, असे टिळक रस्ता विसर्जन मिरवणूक समिती व पोलिसांनी निश्‍चित केले असल्याची माहिती परिमंडळ दोनचे पोलिस उपायुक्त मिलिंद मोहिते यांनी दिली.

सकाळ+ चे सदस्य व्हा

ब्रेक घ्या, डोकं चालवा, कोडे सोडवा!

शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Marathi News Esakal
www.esakal.com