गायब साहित्याची चौकशी कूर्मगतीने आयुक्तांच्या बंगल्यातील घटनेमुळे प्रशासनात अस्वस्थता

पुणे, ता. ८ ः पुणे महापालिका आयुक्तांच्या बंगल्यातून लाखो रुपयांचे साहित्य गायब झाल्याचे समोर आल्यानंतर त्याची चौकशी करण्यासाठी आयुक्तांनी शहर अभियंत्यांवर जबाबदारी टाकली आहे. मात्र, या चौकशीला अजूनही गती आलेली नाही. त्यामुळे ही चौकशी किती दिवसात पूर्ण होणार, असा प्रश्‍न उपस्थित होत आहे.
पुणे महापालिका आयुक्तांच्या बंगल्यातून चार एसी, दोन टीव्ही, झुंबर, पितळी दिवे, ॲक्वागार्ड, डायनिंग टेबल, कॉफी मशिन, किचन पॉट यासह अन्य वस्तू गायब असल्याचे समोर आले. हा प्रकार घडून अनेक दिवस झाले असले तरी प्रशासनाकडून ही घटना दाबण्याचा प्रयत्न सुरु होता. पण माध्यमांनी हा विषय चव्हाट्यावर आणल्यानंतर एकच खळबळ उडाली आहे. थेट आयुक्तांच्या बंगल्याच्या सुरक्षेचा विषय समोर आल्याने प्रशासनामध्ये अस्वस्थता निर्माण झाली होती. सेवानिवृत्त आयुक्त डॉ. राजेंद्र भोसले यांनी बंगला सोडल्यानंतर हा प्रकार समोर आला. तो पर्यंत नवे आयुक्त नवल किशोर राम हे या बंगल्यात राहण्यासाठी आले नव्हते. त्यामुळे बंगल्यात पूर्वी काय साहित्य होते, याची मला कल्पना नाही. याची चौकशी करण्यासाठी शहर अभियंता प्रशांत वाघमारे यांची समिती नेमल्याचे आयुक्तांनी स्पष्ट केले होते. दरम्यान, माध्यमांमध्ये बातमी आल्यानंतर प्रशासनाने ही माहिती बाहेर गेलीच कशी यावरून काही अधिकाऱ्यांना फैलावर घेतल्याने आता भवन, मालमत्ता व्यवस्थापन, विद्युत, अतिरिक्त आयुक्त कार्यालय या विभागातील कर्मचारी, अधिकारीही सावध झाले आहेत.
आयुक्तांच्या बंगल्यातून वस्तू गायब झाल्याची चौकशी शहर अभियंता प्रशांत वाघमारे करणार आहेत. पण प्रशासनाला वस्तू चोरीला गेल्याच्या ऐवजी ही माहिती बाहेर गेलीच कशी याची चौकशी करण्यास अधिक रस दिसत आहे. त्यामुळे चौकशीतून नेमके काय समोर येणार असा प्रश्‍न आहे. दरम्यान, आयुक्त बंगल्यातील गायब झालेले झुंबर परत आले असल्याचे काही अधिकारी सांगत आहेत, अन्य वस्तू अद्याप आलेल्या नाहीत, असे माहिती अधिकार कार्यकर्ते विजय कुंभार यांनी सांगितले.

सुरक्षा रक्षकांच्या बदल्या
महापालिकेत आयुक्त कार्यालयात मनसेच्या पदाधिकाऱ्यांमध्ये व आयुक्तांमध्ये वादावादी झाल्याचे प्रकरण सुरक्षा रक्षकांवर शेकले आहे. मनसेचे कार्यकर्ते थेट आयुक्तांच्या बैठकीच्या दालनात पोचले, त्यांना सुरक्षा रक्षकांनी हटकले नाही. त्यामुळे कायम सेवेतील दोन व इगल सेक्युरिटी अँड पर्सोनल सर्व्हिसेसच्या तीन कंत्राटी कामगारांची इतरत्र बदली केली आहे.