चिमुकलीचा विनयभंग; पाच वर्षे सक्तमजुरी

पुणे, ता. ९ : गॅस सिलिंडर बसविण्यासाठी आलेल्या कामगाराने घरातील तीन वर्षांच्या चिमुकलीचा विनयभंग केल्याप्रकरणातील एकास न्यायालयाने पाच वर्षे सक्तमजुरी आणि पाच हजार रुपये दंडाची शिक्षा सुनावली. दंडाच्या रकमेपैकी चार हजार रुपये मुलीला देण्यात यावे, असेही जिल्हा व अतिरिक्त सत्र न्यायाधीश एस. एम. टाकळीकर यांनी निकालात नमूद केले आहे.
कृष्णा नारायण गावडे (वय ३४, रा. कुर्णी, ता. चंदगड, जि. कोल्हापूर) असे शिक्षा सुनावलेल्याचे नाव आहे. याप्रकरणी मुलीच्या आईने हवेली पोलिस ठाण्यात फिर्याद दिली होती. ही घटना १० एप्रिल २०१९ ला घडली होती. गॅस सिलिंडर संपल्याने फिर्यादीने वितरण करणाऱ्याला फोन लावून सिलिंडर आणण्यास सांगितले. मात्र, तो गावी असल्याने त्याने अन्य साथीदाराला सिलिंडर देण्यास सांगितले. त्यानुसार एक व्यक्ती सिलिंडर घेऊन आला. तो सिलिंडर लावत असताना फिर्यादी या पैसे आणण्यासाठी दुसऱ्या खोलीत गेल्या. या दरम्यान, त्या ठिकाणी खेळत असलेल्या मुलीचा त्याने विनयभंग केला. त्यामुळे फिर्यादी यांनी शेजारी राहात असलेल्या नागरिकांच्या मदतीने आरोपीला पकडत पोलिसांच्या ताब्यात दिले. या प्रकरणात, सरकार पक्षातर्फे सरकारी वकील सुचित्रा नरोटे यांनी बाजू मांडली. त्यांनी सहा साक्षीदार तपासले. यामध्ये मुलगी, फिर्यादी व गॅस सिलिंडर पोचविणारा ड्रायव्हर यांची साक्ष महत्त्वाची ठरली.