‘सकाळ ऑटो एक्स्पो’ला उत्साहात सुरुवात

पुणे, ता. ९ : वाहनप्रेमींसाठी पर्वणी ठरणाऱ्या ‘सकाळ ऑटो एक्स्पो’ला शनिवारी उत्साहात सुरुवात झाली. यामध्ये नागरिकांना दुचाकी, चारचाकी आणि इलेक्ट्रिक वाहनांचे २० हून अधिक ब्रँड्स व ६० पेक्षा अधिक मॉडेल्स एकाच छताखाली पाहण्याची, टेस्ट राईड घेण्याची आणि फायनान्स सल्लागारांकडून थेट मार्गदर्शन मिळवण्याची अनोखी संधी मिळाली.
कर्वेनगर येथील डीपी रस्त्यावरील पंडित फार्म येथे भरलेल्या या एक्स्पोचे उद्‍घाटन ‘विद्या सहकारी बँक लिमिटेड’चे अध्यक्ष विद्याधर अनास्कर यांच्या हस्ते झाले. याप्रसंगी विद्या सहकारी बँकेचे उपाध्यक्ष नितीन किवळकट, नमः शिवाय हिरोचे संचालक शिव ओम उणेचा, डेक्कन होंडाचे मार्केटिंग प्रमुख अनिल चौघूले, अरिहंत सुझुकीचे सेल्स प्रमुख मिलिंद बिरारी आदी उपस्थित होते.

अनास्कर म्हणाले, ‘‘पूर्वी एखादी गोष्ट विकत घ्यायची असेल तर माणूस वर्षानुवर्षे पैसे साठवत असे. त्या साठवणीसाठी त्याला आपल्या उमेदीचे, आनंदाचे क्षण कष्टाच्या ओझ्यात घालवावे लागत आणि जेव्हा ती वस्तू हातात यायची, तेव्हा तिचा आनंद घेण्याचा सुवर्णकाळ निघून गेलेला असायचा. आज मात्र चित्र पालटले आहे. कर्जाच्या माध्यमातून तुम्ही मनात असलेली गोष्ट ताबडतोब घेऊ शकता आणि त्याचवेळी तिचा आनंदही उपभोग घेऊ शकता. परतफेडीचा प्रवास चालू असतानाच आयुष्य अधिक सुखी, समाधानकारक बनवण्याची संधी मिळते.’’
कर्वेनगर येथील डीपी रस्त्यावरील पंडित फार्ममध्ये आयोजित केलेला ‘सकाळ ऑटो एक्स्पो’ नागरिकांसाठी रविवारी देखील (ता. १०) सकाळी ११ ते रात्री ८ या वेळेत खुला असणार आहे. या एक्स्पोसाठी ‘विद्या सहकारी बॅंक लिमिटेड’ हे बॅंकिंग पार्टनर आहेत. येथे नागरिकांसाठी वाहन क्षेत्रातील नवनवीन तंत्रज्ञान आणि पर्याय उपलब्ध होत आहेत.

‘सकाळ ऑटो एक्स्पो’ला नेहमीच मिळणाऱ्या चांगल्या प्रतिसादामुळे अनेक वर्षांपासून आम्ही यात सहभागी होत आहे. प्रत्येक एक्स्पोमध्ये आमचे चांगले बुकिंग्स होतात. तसेच ग्राहकांना एकाच बजेटचे अनेक पर्याय उपलब्ध असल्याने नेमकी कोणती गाडी घ्यायची, याचा निर्णय घेणे सोपे होते.
- मिलिंद बिरारी, सेल्स प्रमुख, अरिहंत सुझुकी

‘सकाळ ऑटो एक्स्पो’ प्रदर्शनामुळे नागरिकांना गाड्यांचे नविन आणि विविध प्रकार एकाच ठिकाणी पाहायला मिळतात. नमो शिवाय हिरोच्या सहा शाखा असून एक्स्पोमधील सहभागी प्रत्येक ग्राहकाला तीन हजार रुपये सवलत दिली जाणार आहे.
- शिव ओम उणेचा, संचालक, नमः शिवाय हिरो

आमची उत्पादने आणि सेवा प्रदर्शित करण्यासाठी ‘सकाळ ऑटो एक्स्पो’ हे प्रभावी व्यासपीठ आहे. तसेच ग्राहकांना देखील एकाच छताखाली अनेक ब्रँडची उपस्थिती असल्याने ग्राहकांना फायदा होतो. या एक्स्पोमध्ये आम्हाला ग्राहकांचा सकारात्मक प्रतिसाद मिळतो.
- अनिल चौघूले, मार्केटिंग प्रमुख, डेक्कन होंडा

‘सकाळ ऑटो एक्स्पो’मध्ये आल्यावर एकाच ठिकाणी विविध गाड्या आणि मॉडेल्स पाहायला मिळाल्यामुळे मला योग्य गाडी निवडणे खूप सोपे झाले. टेस्ट राईडची सुविधा आणि फायनान्ससंबंधी मिळालेल्या मार्गदर्शनामुळे खरेदीचा निर्णय आत्मविश्वासाने घेता आला.
- प्रिया देशमुख, ग्राहक

हे लक्षात ठेवा:
- कोठे : पंडित फार्म, डीपी रस्ता, कर्वेनगर
- केव्हा : १० ऑगस्ट २०२५
- कधी : सकाळी ११ ते रात्री ८
- सुविधा : प्रवेश व पार्किंग मोफत