माझा कचरा, माझी जबाबदारी उपक्रमाला उत्स्फूर्त प्रतिसाद

पुणे, ता. ९ : ‘माझा कचरा-माझी जबाबदारी’ हा संदेश प्रत्यक्षात उतरवत हडपसर परिसरातील नागरिकांनी स्वच्छतेचा आदर्श निर्माण केला आहे. भारत फोर्जच्या औद्योगिक क्षेत्रातील सामाजिक जबाबदारी (सीएसआर) उपक्रमांतर्गत एक हजार ६८० हून अधिक कुटुंबे दररोज घरगुती व बागेतील जैविक कचऱ्याचे कंपोस्टमध्ये रूपांतर करीत आहेत.
यंदा या मोहिमेत आणखी ६०० कुटुंबांचा सहभाग वाढला असून, दरवर्षी तब्बल ६६५ टन कचऱ्याचे उच्चप्रतीच्या सेंद्रिय खतामध्ये रूपांतर होत आहे. यंदा अभियानाचा शुभारंभ निर्मल टाउनशिप सोसायटीत झाला. या वेळी सोसायटीचे रहिवासी, महापालिकेचे प्रतिनिधी आणि स्वयंसेवक मोठ्या संख्येने उपस्थित होते. कचऱ्याचे व्यवस्थापन ही केवळ महापालिकेची जबाबदारी नसून, प्रत्येक नागरिकाचीही आहे, हा संदेश या मोहिमेतून दिला जात आहे.
जैविक कचऱ्याचे शास्त्रशुद्ध पद्धतीने कंपोस्टमध्ये रूपांतर केल्याने एकीकडे कचऱ्याचा प्रश्न सुटतो, तर दुसरीकडे उच्च दर्जाचे सेंद्रिय खत उपलब्ध होते. या उपक्रमामुळे परिसरातील स्वच्छता, पर्यावरण संवर्धन आणि हिरवाईतही भर पडत असल्याचे आयोजकांनी सांगितले.