बी.ई, बी.टेक दुसऱ्या फेरीची निवड यादी उद्या होणार जाहीर

पुणे, ता. ९ : राज्यातील अभियांत्रिकी आणि तंत्रज्ञान प्रथम वर्ष पदवी (बी.ई. आणि बी.टेक) अभ्यासक्रमाच्या प्रवेशाच्या दुसऱ्या फेरीची निवड यादी सोमवारी (ता. ११) जाहीर होणार आहे. या यादीत निवड झालेल्या विद्यार्थ्यांना मंगळवार (ता. १२) ते गुरुवार (ता. १४) दरम्यान प्रवेश निश्चित करता येणार आहेत.
राज्यातील शासकीय, शासकीय अनुदानित, विद्यापीठ व्यवस्थापित, विद्यापीठांचे संलग्न विभाग, विनाअनुदानित खासगी शिक्षण संस्थांमधील बी.ई. आणि बी.टेक अभ्यासक्रमाच्या प्रवेशाची प्रक्रिया महाराष्ट्र राज्य सामाईक प्रवेश परीक्षा कक्षामार्फत राबविण्यात येते. या प्रवेशाची पहिली फेरी नुकतीच पूर्ण झाली आहे. या अभ्यासक्रमाच्या केंद्रीय प्रवेश फेरीसाठी आतापर्यंत दोन लाख १७ हजारांहून अधिक विद्यार्थ्यांनी ऑनलाइन नोंदणी केली आहे, तर पहिल्या फेरीत एक लाख ४४ हजार ७७६ विद्यार्थ्यांना प्रवेशासाठी महाविद्यालय मिळाले.
पहिल्या फेरीत प्रवेशासाठी महाविद्यालय मिळालेल्या विद्यार्थ्यांना चार ऑगस्टपर्यंत प्रवेशासाठी मुदत दिली होती. त्यानंतर मंगळवारी (ता. ५) प्रवेशाच्या दुसऱ्या फेरीसाठीच्या रिक्त जागांचा तपशील जाहीर करण्यात आला. ‘कॅप’ प्रवेशाच्या दुसऱ्या फेरीसाठी विद्यार्थ्यांना महाविद्यालयांचा पसंतीक्रम नोंदविण्यासाठी बुधवार (ता. ६) ते शुक्रवार (ता. ८) पर्यंतचा कालावधी दिला होता. त्यानंतर आता सोमवारी दुसऱ्या फेरीची तात्पुरती अलॉटमेंट यादी जाहीर केली जाईल. निवड यादीत प्रवेशासाठी महाविद्यालय मिळालेल्या विद्यार्थ्यांना १२ ते १८ ऑगस्टपर्यंत प्रवेश निश्चित करता येणार आहे.

बी.ई./बी.टेक प्रवेश फेरीचे वेळापत्रक
कालावधी : तपशील
- ११ ऑगस्ट : दुसऱ्या फेरीत विद्यार्थ्यांची तात्पुरती अलॉटमेंट यादी (निवड यादी) जाहीर करणे
- १२ ते १४ ऑगस्ट : दुसऱ्या फेरीत प्रवेशासाठी मिळालेल्या महाविद्यालयात प्रवेश घेणे, प्रवेशासाठी मिळालेल्या महाविद्यालयात जाऊन प्रवेश निश्चिती करणे, प्रवेशासाठी आवश्यक कागदपत्रे सबमिट करणे आणि शुल्क भरणे
- १६ ऑगस्ट : तिसऱ्या फेरीसाठी रिक्त जागांचा तपशील जाहीर करणे
- १७ ते १९ ऑगस्ट : तिसऱ्या फेरीत सहभागी होण्यासाठी अर्ज निश्चिती करणे
- २२ ऑगस्ट : तिसऱ्या फेरीची निवड यादी जाहीर करणे