महिलेकडील दागिने हिसकावणारे गजाआड

पुणे, ता. ९ : पादचारी ज्येष्ठ महिलेकडील दागिने हिसकावून पसार झालेल्या चोरट्यांना सिंहगड रस्ता पोलिसांनी अटक केली. चोरट्यांनी नऱ्हे भागातील झील कॉलेज चौकात पादचारी महिलेकडील दागिने हिसकावून नेल्याची घटना घडली होती. चोरट्यांकडून ६० हजारांचे सोन्याचे दागिने आणि दुचाकी असा मुद्देमाल जप्त करण्यात आला.
राहुलकुमार श्यामकुमार (वय ३३) आणि गोविंदाकुमार ओमप्रकाश (वय ३५, दोघे सध्या रा. गणेश हाईट्स, मतेनगर, अंबाईदरा, धायरी) अशी अटक केलेल्या चोरट्यांची नावे आहेत. तक्रारदार महिला नऱ्हेत राहायला आहेत. त्या चार ऑगस्टला झील कॉलेज चौकातून निघाल्या होत्या. त्यावेळी दुचाकीस्वार चोरटे राहुलकुमार आणि गोविंदाकुमार यांनी त्यांच्या गळ्यातील दागिने हिसकावून नेले. या घटनेची माहिती मिळाल्यानंतर सिंहगड रस्ता पोलिस ठाण्यातील उपनिरीक्षक संतोष भांडवलकर यांनी घटनास्थळी भेट दिली. त्यांनी सीसीटीव्ही कॅमेऱ्यांचे चित्रीकरण तपासले. दोघे जण अंबाईदरा परिसरात थांबल्याची माहिती भांडवलकर यांना मिळाली. त्यानंतर पथकाने सापळा लावून दोघांना पकडले. त्यांनी दागिने चोरल्याची कबुली दिली.