सराईतांकडून दोन पिस्तूल जप्त

पुणे, ता. ९ : खून प्रकरणातील आरोपी असलेल्या सराईतांकडून गुन्हे शाखेने दोन पिस्तुले जप्त केले. दोन्ही आरोपींना अटक करण्यात आली आहे.
या प्रकरणी लक्ष्मीपुत्र नागेश बडधाळ (वय २४, रा. हरीतारा सोसायटी, भीमनगर, कोंढवे धावडे) आणि राहुल राजू थोरात (रा. दत्तवाडी, म्हसोबा चौक, पदमगल्ली) अशी अटक केलेल्यांची नावे आहेत. गुन्हे शाखेचे युनिट तीनचे पथक शुक्रवारी गस्त घालत होते. आरोपी लक्ष्मीपुत्र याच्याकडे पिस्तूल असल्याची माहिती पोलिस कर्मचारी अमित बोडरे आणि महेंद्र तुपसौंदर यांना मिळाली. पोलिसांच्या पथकाने सापळा लावून त्याला ताब्यात घेतले. त्याच्याकडून देशी बनावटीचे एक पिस्तूल जप्त केले. त्याची चौकशी करण्यात आली. तेव्हा दुसरे पिस्तूल साथीदार राहुलकडे ठेवण्यास दिल्याची माहिती मिळाली. त्यानंतर पोलिसांनी राहुलला ताब्यात घेऊन त्याच्याकडून एक पिस्तूल जप्त केले.

देशी बनावटीचे पिस्तूल जप्त
देशी बनावटीचे पिस्तूल बाळगणाऱ्या सराईताला शिवाजीनगर पोलिसांनी अटक केली. त्याच्याकडून देशी बनावटीचे पिस्तूल आणि काडतूस जप्त करण्यात आले. अभिषेक राजू टेंकल (वय २३, रा. विष्णुकृपा नगर, शिवाजीनगर) असे अटक केलेल्याचे नाव आहे. शिवाजीनगर भागात पोलिसांचे पथक गस्त घालत होते. त्या वेळी अभिषेक हा ज्ञानेश्वर पादुका चौकात थांबला असून त्याच्याकडे पिस्तूल असल्याची माहिती पोलिस नाईक सचिन जाधव यांना मिळाली. पोलिसांनी सापळा लावून त्याला पकडले.