हिवाळ्यात पुणे विमानतळ गजबजणार पंधरा नवीन स्लॉटचा वापर होणार, विमानांची व प्रवाशांची संख्या वाढणार

पुणे, ता. १० ः पुणे विमानतळाचे ‘हिवाळी वेळापत्रक’ (विंटर शेड्यूल) ऑक्टोबरच्या शेवटच्या आठवड्यात लागू होणार आहे. याच हंगामात पुणे विमानतळासाठी मंजूर झालेल्या १५ स्लॉटचा विनियोग होईल. त्यामुळे आताचे २२० व नवीन १५ अशा मिळून सुमारे २३५ स्लॉटचा वापर होणार आहे. पुणे विमानतळाच्या इतिहासात एवढ्या मोठ्या प्रमाणात पहिल्यांदाच स्लॉट मिळाले आहेत. यामुळे हिवाळी हंगामात सध्या सुरू असलेल्या मार्गांसह नवीन मार्गांसाठीदेखील पुण्याहून विमानसेवा सुरू होणार आहे. हिवाळी हंगामात पुणे विमानतळ प्रवाशांनी चांगलेच गजबजणार, हे निश्‍चित आहे.
पुणे विमानतळावर प्रवासी सेवा देणाऱ्या विमान कंपन्यांकडून ‘स्लॉट’साठी प्रस्ताव देण्याच्या हालचाली सुरू झाल्या आहेत. यात नवीन स्लॉटचादेखील समावेश असणार आहे. ऑगस्टच्या अखेरीस या कंपन्या विमानतळ प्रशासनाला ‘स्लॉट’संदर्भातील प्रस्ताव देण्याची शक्यता आहे. विमानतळ प्रशासनाला प्रस्ताव प्राप्त झाल्यावर तो नागरी विमान वाहतूक महासंचालनालया(डीजीसीए)कडे पाठविला जाईल. ‘डीजीसीए’ने मंजुरी दिल्यानंतर विमानांच्या उड्डाणाचा मार्ग मोकळा होईल.

‘नवीन डेस्टिनेशन’ जोडले जाणार
- विमान कंपन्या पुणे विमानतळावर सध्या सेवा देत असलेल्याच मार्गावर सेवा वाढविण्यासाठी व काही नवीन मार्गांवर सेवा देण्यासाठी इच्छुक आहेत.
- पुण्याहून सध्या ३४ शहरांसाठी विमानसेवा सुरू आहे.
- यात किमान ५ ते ७ नवीन शहरे जोडले जाण्याची प्राथमिक माहिती आहे.
- सध्या पुणे विमानतळाला २२० स्लॉट मंजूर असून, यापैकी २१२ स्लॉटचा प्रत्यक्षात वापर केला जात आहे.
- ८ स्लॉट विमान कंपन्यांनी नुसते आरक्षित करून ठेवले आहे.
- १५ स्लॉटचा कालावधी सकाळी ६ ते रात्री १० वाजून २९ मिनिटांपर्यंत असणार आहे.
----------------
‘‘पुणे विमानतळाला मिळालेल्या १५ स्लॉटचा वापर ‘विंटर शेड्यूल’मध्ये होणार आहे. त्यासाठीची प्रक्रियादेखील सुरू झालेली आहे. ‘डीजीसीए’ने मान्यता देताच याची अंमलबजावणी सुरू होणार आहे.
- संतोष ढोके, विमानतळ संचालक, पुणे
---------------