भावाला मारण्याची धमकी दिल्याने आत्महत्या

पुणे, ता. १० : राखी पौर्णिमेला भावाला बोलाविल्यास जिवे मारण्याची धमकी दिल्याने उच्चशिक्षित विवाहित तरुणीने गळफास घेऊन आत्महत्या केली. शनिवारी रात्री अकराच्या सुमारास कात्रज परिसरातील आंबेगाव बुद्रूक भागात ही घटना घडली. माहेरहून पैसे आणण्यासाठी विवाहितेचा शारिरिक आणि मानसिक छळ करून तिला आत्महत्येस प्रवृत्त केल्याच्या आरोपावरून भारती विद्यापीठ पोलिसांनी पतीसह सासरकडील नातेवाइकांवर गुन्हा दाखल केला आहे.
स्नेहा विशाल झेंडगे (वय २७, रा. आंबेगाव बुद्रूक, कात्रज) असे आत्महत्या केलेल्या विवाहितेचे नाव आहे. याबाबत स्नेहा यांचे वडील कैलास मच्छिंद्र सावंत (वय ५५, रा. कर्देहळी, जि. सोलापूर) यांनी भारती विद्यापीठ पोलिस ठाण्यात फिर्याद दिली आहे. या प्रकरणी पती विशाल झेंडगे, सासरे संजय झेंडगे, सासू विठाबाई झेंडगे, दीर विनायक झेंडगे, नणंद तेजश्री थिटे यांच्यासह सात जणांवर गुन्हा दाखल केला आहे.
पोलिसांनी दिलेल्या माहितीनुसार, स्नेहा आणि विशाल यांचा २ मे २०२४ ला विवाह झाला होता. विवाहानंतर काही दिवसांतच सासरकडील मंडळींनी कंपनी चालविण्यासाठी माहेरून २० लाख रुपये आणण्याची मागणी केली. पैशांसाठी तिच्यामागे तगादा लावला. पैशांसाठी स्नेहाला वारंवार शिवीगाळ, तसेच मारहाण केली होता. तिचा शारिरिक आणि मानसिक छळ केला. राखी पौर्णिमेला भावाला बोलाविल्यास त्याला जिवे मारू, अशी धमकी तिला दिली होती. छळ असह्य झाल्याने स्नेहाने शनिवारी रात्री राहत्या घरात गळफास घेऊन आत्महत्या केली, असे फिर्यादीत नमूद केले आहे.

विवाहितेने दिली होती तक्रार
लग्नाच्या काही महिन्यांनंतर सुरू झालेला छळ असह्य झाल्याने स्नेहाने पतीसह नातेवाईकांविरोधात पोलिसांकडे तक्रार केली होती. मात्र, सासरे संजय झेंडगे यांचा साडू भाऊसाहेब कोल्हाळ याने तिला दमदाटी करून तक्रार मागे घेण्यास भाग पाडले होते. तक्रार मागे घेतल्यानंतरही स्नेहाचा छळ सुरू होता.

पोलिसांकडून याबाबतीत तपास सुरु आहे. गुन्हा नोंद केला असून पती आणि सासू-सासरे अशा तिघांना ताब्यातही घेतले आहे.
- राहुलकुमार खिलारे,
वरिष्ठ पोलिस निरिक्षक, भारती विद्यापीठ ठाणे