लोकशाही वाचविणाऱ्यांत आपण असावे बाळासाहेब थोरात यांची अपेक्षा; आदर्श कार्यकर्ता पुरस्काराचे वितरण

पुणे, ता. १० ः ‘‘केंद्रीय निवडणूक आयुक्ताच्या निवड समितीमधून सरन्यायाधीशांना वगळण्यात आले आहे. सध्या कायदे तेच आहेत. मात्र, ते राबविणारे साजेसे नाहीत. हा कालखंड लोकशाहीसाठी घातक आहे. आपण लोकशाही वाचविणाऱ्यांमध्ये असले पाहिजे,’’ अशी अपेक्षा माजी महसूलमंत्री बाळासाहेब थोरात यांनी केली.
धनंजय थोरात आदर्श कार्यकर्ता पुरस्कार समितीतर्फे धनंजय थोरात यांच्या १७ व्या स्मृतिदिनानिमित्त बाळासाहेब थोरात यांच्या हस्ते आदर्श कार्यकर्ता पुरस्काराचे वितरण करण्यात आले. यावेळी ज्येष्ठ नेते उल्हास पवार, महाराष्ट्र टाइम्सचे संपादक पराग करंदीकर उपस्थित होते. समितीचे संयोजक मोहन जोशी अध्यक्षस्थानी होते. सामाजिक कार्यकर्ते अशोक देशमाने, माहिती अधिकार कार्यकर्ते जुगल राठी आणि शास्त्रीय गायक रघुनंदन पणशीकर यांना धनंजय थोरात आदर्श कार्यकर्ता पुरस्कार देण्यात आला. पिनाकिन पणशीकर यांनी वडिलांच्यावतीने पुरस्कार स्वीकारला.
प्रगत राज्य म्हणवणाऱ्या महाराष्ट्राला शेतकऱ्यांच्या आत्महत्या शोभणाऱ्या नसल्याची खंत व्यक्त करत थोरात म्हणाले, ‘‘कायदे चांगले असून चालत नाही. ते राबविणारे कोण आहेत, हेही महत्त्वाचे आहे, असे डॉ. बाबासाहेब आंबेडकर म्हणाले होते. हल्ली माहिती देण्यास टाळाटाळ केली जाते. हक्क काढून घेतले जात आहेत. माहिती अधिकार कायदा आणण्याच्या उद्योगात आम्हीही होतो. अण्णा हजारे यांचे उपोषण सोडण्याचे काम माझ्याकडे असायचे. ते उपोषणाला बसले की मुख्यमंत्र्यांना माझी आठवण येत होती.’’

देशमाने म्हणाले, ‘‘परभणी येथून पुण्यात आलो. आयटी कंपनीमध्ये नोकरी करीत असताना शेतकरी आत्महत्या घटनांमुळे अस्वस्थ झाल्याने त्यांच्या मुलांसाठी काम सुरू केले.’’
वाहने वाढली की कोंडी वाढते. वाहने वाढविण्यावर सरकारचा भर आहे. पुणे महानगर परिवहन महामंड‌ळाचे (पीएमपी) १६ वर्षांत २२ अध्यक्ष झाले. येतात ते दरवाढ करून जातात.’’ अशी टीका राठी यांनी केली. पराग करंदीकर यांनी प्रास्ताविक केले. सुधीर गाडगीळ यांनी सूत्रसंचालन केले.

फोटोः 38979