नगर रस्ता परिसरात पाण्यासाठी कसरत

पुणे, ता. ११ : भामा आसखेड जलकेंद्रातून नगर रस्ता परिसरातील पाणी पुरवठ्याचे वेळापत्रक महापालिकेने बदलले होते; पण अनेक ठिकाणी अपूर्ण असलेली कामे, कमी दाबाने होणारा पाणीपुरवठा यामुळे नागरिकांच्या तक्रारींमुळे प्रशासनाने हा निर्णय मागे घेतला आहे. आवश्‍यक सुधारणा केल्यानंतर सुधारित वेळापत्रकानुसार पाणीपुरवठा केला जाईल, असे प्रशासनाकडून सांगितले गेले आहे. मात्र, प्रशासनाच्या चुकीमुळे नागरिकांची तारेवरची कसरत होत आहे.
महापालिकेतर्फे विमाननगर, लोहगाव, धानोरी, वडगाव शेरी, कलवड यासह अन्य भागांत भामा आसखेड धरणातून पाणीपुरवठा केला जातो. या भागात महापालिकेने नव्या पाण्याच्या टाक्या बांधल्या आहेत. त्यामुळे या भागातील नागरिकांना पुरेसे व पूर्ण दाबाने पाणी पुरवठा होईल, असे सांगण्यात येत होते. महापालिकेने याठिकाणी कामे केल्यानंतर ३१ जुलैपासून पाण्याच्या वेळापत्रकात बदल केला. पहाटे सहा ते अकरा या वेळेत होणारा पाणीपुरवठा रात्री, मध्यरात्री आणि सकाळी अशा तीन टप्प्यांत करण्याचा निर्णय घेण्यात आला; पण काही भागात व्हॉल्व्ह बसविण्याची कामे अपूर्ण राहिली, काही ठिकाणी नव्याने टाकलेल्या जलवाहिन्या अद्याप जोडण्यात आल्या नसल्याने पाणी पुरवठ्यामध्ये अडचणी निर्माण झाल्या. वेळेवर पाणी येत नसल्याने नागरिकांनी प्रशासनाकडे तक्रारी सुरू केल्या. त्यावेळी प्रशासनाला कामातील त्रुटी लक्षात आल्या. गेल्या चार-पाच दिवसांपासून तक्रारी आल्याने हे नवीन वेळापत्रक रद्द करून पूर्वीच्या वेळापत्रकानुसार पाणीपुरवठा करण्यास सुरुवात केली आहे.
पाणीपुरवठा विभागाचे प्रमुख नंदकिशोर जगताप म्हणाले, ‘‘वडगाव शेरीसह अन्य भागांत काही कामे अपूर्ण राहिली आहेत. त्यामुळे ही कामे पूर्ण करण्यात येणार असल्याने सुधारित वेळापत्रक मागे घेतले आहे. पूर्वीप्रमाणे या सर्व भागात पाणीपुरवठा केला जात आहे. पुढील आठ दिवसांत ही कामे केल्यानंतर सुधारित वेळापत्रक लागू केले जाईल.’’