तलाठ्यांची जिल्हाधिकाऱ्यांशी थेट भेट

पुणे, ता. १२ : सातबारा उताऱ्यावरील वारसा नोंदी, कर्ज बोजा दाखल करणे अथवा कमी करणे, अपाक (अज्ञान पालककर्ता), एकत्र कुटुंब मॅनेजर (एकुमॅ) नोंद कमी करणे आदी नागरिकांची कामे वेळेत मार्गी लावण्यासाठी जिल्हा प्रशासनाने ई-हक्क प्रणालीची सुविधा उपलब्ध करून दिली आहे. मात्र, दिलेल्या मुदतीत कामे मार्गी न लावणाऱ्या तलाठ्यांना आता जिल्हाधिकाऱ्यांशी प्रत्यक्ष भेटीचे ‘बक्षीस’ मिळणार आहे.
ई-हक्क प्रणालीमुळे नागरिकांना या नोंदींसाठी तलाठी कार्यालयात जाण्याची गरज राहिली नाही. तक्रार असलेल्या नोदींसाठी पूर्वी २०८ दिवस लागत असत. तो कालावधी आता १२५ दिवसांवर, तर तक्रार नसलेल्या नोंदींसाठीचा कालावधी २१ दिवसांवर आला आहे. आता मयत व्यक्तीनंतर त्यांच्या वारसाची नोंद करण्यासाठी नागरिकांना pdeigr.maharashtra.gov.in या संकेतस्थळावर जाऊन लॉगिंग करून ऑनलाइन अर्ज करावा लागणार आहे. हा अर्ज संबंधित गावातील तलाठ्याकडे जाईल. तलाठी त्याची ऑनलाइन पडताळणी करतील. कागदपत्रे अपूर्ण असतील तर त्याची माहिती अर्जदाराला ई-मेलद्वारे कळविण्यात येईल. सर्व कागदपत्रे पूर्ण असतील तर तलाठी त्याची नोंद सातबारा उताऱ्यावर करणार आहे.

स्वतंत्र कक्षाची स्थापना
सातबारा उताऱ्यावर नोंद घेण्यास राज्यात सर्वाधिक वेळ पुणे जिल्ह्यात लागत असे. तो कालावधी कमी करण्यासाठी जिल्हाधिकारी जितेंद्र डुडी यांनी विशेष मोहीम हाती घेतली आहे. त्यासाठी स्वतंत्र कक्ष स्थापन करून तेथे दोन कर्मचाऱ्यांची नियुक्ती केली आहे. ज्या तालुक्यात ई-हक्क प्रणालीमध्ये दाखल झालेले अर्ज वेळेत निकाली काढले जात नाहीत, तेथील तलाठी अथवा मंडल अधिकाऱ्यांशी संपर्क साधून त्यामागील कारणे शोधली जातात; परंतु त्यानंतरही काही तलाठी अथवा मंडल अधिकाऱ्यांकडून कामे वेळेत होत नसल्याचे निदर्शनास आले आहे. त्यानुसार अशा तलाठी आणि मंडल अधिकाऱ्यांना जिल्हाधिकाऱ्यांच्या भेटीचे निमंत्रण दिले जाणार आहे.

जिल्ह्यातील एक लाख २१ हजार ८९९ अर्जांपैकी ९८ हजार २१५ अर्ज मंजूर केले आहेत. उर्वरित सुमारे २२ हजार अर्ज अपुऱ्या कागदपत्रांमुळे नाकारले आहेत. या अर्जदारांना कागदपत्रांची पूर्तता करण्याच्या सूचना दिल्या आहेत. सद्यःस्थितीत एक हजार ६०८ नोंदी प्रलंबित आहेत.
- नामदेव टिळेकर,
उपजिल्हाधिकारी, कुळकायदा शाखा