गणेशोत्सवासाठी समाधानकारक निर्णय घेणार

पुणे, ता. १२ : ‘‘गणेशोत्सवासंदर्भात बैठका सुरू आहेत. त्यामध्ये सगळ्यांचे समाधान होईल, असा सर्व मंडळाच्या दृष्टीने योग्य निर्णय घेतला जाईल. एक गणपती-एक पथक, इतर गणपती मंडळांना चांगला वेळ अशा अनेक मुद्यांसदर्भात विचार सुरू आहेत. गणेश मंडळाच्या माध्यमातून चांगले काम करणाऱ्यांचा सन्मान केला जातो, हे स्तुत्य आहे. गेल्यावर्षापेक्षा चांगले काम यापुढेही कार्यकर्त्यांनी करावे,’’ अशी अपेक्षा सहपोलिस आयुक्त रंजनकुमार शर्मा यांनी व्यक्त केली.

पुणे परिवाराच्या वतीने देण्यात येणारा ‘लोकमान्य जीवन गौरव पुरस्कार’ यंदा श्री तुळशीबाग सार्वजनिक गणेशोत्सव ट्रस्टचे माजी अध्यक्ष दत्तात्रय कावरे यांना तर दिपक दाते, हेमचंद्र दाते यांना ‘लोकमान्य गणेश सेवा पुरस्कार’ प्रदान करण्यात आला. स. प. महाविद्यालयाच्या लेडी रमाबाई हॉलमध्ये हा पुरस्कार वितरण सोहळा झाला. या वेळी आमदार हेमंत रासने, माजी आमदार उल्हास पवार, परिमंडळ एकचे पोलीस उपायुक्त कृषीकेश रावले, अखिल मंडई मंडळाचे अध्यक्ष अण्णा थोरात, श्रीमंत दगडूशेठ हलवाई गणपती ट्रस्टचे अध्यक्ष सुनील रासने, महेश सूर्यवंशी, आयोजक विनायक घाटे, ॲड. प्रताप परदेशी, शिरीष मोहिते, प्रकाश ढमढेरे उपस्थित होते.
शर्मा म्हणाले, ‘‘गणपती मंडळाचे पदाधिकारी व कार्यकर्त्यांनी गणेशोत्सवात पोलिसांसोबत काम करून, कोणतीही दुर्घटना टाळण्यासाठी तसेच नागरिकांच्या सुरक्षिततेची काळजी घ्यावी. मंडळांनी पोलिसांच्या कोणत्याही कृतीचा आणि सूचनेचा राग मानून घेऊ नये. तुमच्या
सुरक्षेसाठी पोलिस असतात. पोलिस सदैव गणपती मंडळांच्या सोबतच आहेत.’’
विनायक घाटे यांनी प्रास्ताविक केले. ॲड. प्रताप परदेशी यांनी पुरस्काराची माहिती दिली. प्रकाश ढमढेरे यांनी आभार मानले.

यांचा केला सन्मान
होनाजी तरुण मंडळ ट्रस्टचे अध्यक्ष राहुल आलमखाने, तरुण शिवगणेश मित्र मंडळाचे कार्याध्यक्ष योगेश जगताप, सावित्रीबाई फुले पुणे विद्यापीठ सेवक हनुमान मंडळाचे कार्यकर्ते ओंकार कलढोणकर, विधायक मित्र मंडळाचे अध्यक्ष अभिषेक मारणे, सहजीवन गणेश मित्र मंडळ ट्रस्टचे अध्यक्ष नितीन पाटील यांना आदर्श गणेशोत्सव कार्यकर्ता पुरस्काराने सन्मानित करण्यात आले. समर्थ प्रतिष्ठान वाद्य पथकाचे संजय सातपुते यांना गणराया गुणगौरव पुरस्कार तर सामाजिक कार्यकर्ता सिराज पूनावाला यांना सद्‍भावना सलोखा पुरस्कार देऊन गौरविण्यात आले.