पद्मावतीत जुगार अड्ड्यावर छापा; सातही जणांवर गुन्हा दाखल

पुणे, ता. १२ : सहकारनगर पोलिस ठाण्याच्या हद्दीतील पद्मावती भागात सुरू असलेल्या जुगार अड्ड्यावर पोलिसांनी कारवाई केली. यात सात जणांना पकडले. गुन्हे शाखेच्या युनिट दोनने सोमवारी रात्री उशिरा ही कारवाई केली.
या प्रकरणी सहकारनगर पोलिस ठाण्यात संग्राम दिलीप भोसले याच्यासह सात जणांविरोधात महाराष्ट्र जुगार प्रतिबंधक कायद्यान्वये गुन्हा दाखल केला आहे. याबाबत पोलिस अंमलदार विजयकुमार पवार यांनी तक्रार दिली आहे. पद्मावती परिसरातील धनकवडीत अष्टद्वार सोसायटीजवळील पत्राच्या शेडमध्ये जुगार सुरू असल्याची माहिती गुन्हे शाखेच्या युनिट दोनला समजली. त्यानुसार, वरिष्ठ निरीक्षक अंजुम बागवान व त्यांच्या पथकाने छापा टाकला. तेव्हा तेथे सात जणांना पत्त्यांचा जुगार खेळताना पकडले. पोलिसांनी सातही जणांना ताब्यात घेऊन त्यांच्यावर गुन्हा दाखल केला आहे.

लोणी काळभोरमध्येही छापा
पुणे-सोलापूर रस्त्यावरील लोणी काळभोर मटका अड्ड्यावर पोलिसांनी छापा टाकला. यात मारुती टक्केवार (रा. कदमवाक वस्ती, लोणी काळभोर) याच्यावर गुन्हा दाखल केला. पोलिस शिपाई सूरज कुंभार यांनी याबाबत लोणी काळभोर पोलिस ठाण्यात तक्रार दिली आहे. वारजे माळवाडी भागातही जुगार अड्ड्यावर पोलिसांनी कारवाई करून बाळू धोंडिबा गडसिंग (वय ५५), लक्ष्मण गोरख तरंगे (वय ३६, दोघे रा. दांगट इस्टेट, शिवणे) यांच्यावर गुन्हा दाखल केला. पोलिस शिपाई सुनील मुठे यांनी याबाबत फिर्याद दिली आहे.

मटक्याच्या चिठ्ठ्या जप्त
मुंबई-पुणे रस्त्यावरील बोपोडी चौकात मटक्याची चिठ्ठी घेणाऱ्याला खडकी पोलिसांनी पकडले. त्याच्याकडून मटक्याच्या आकड्याच्या चिठ्ठ्या जप्त करण्यात आल्या. या प्रकरणी जॉन पॅट्रिक जोसेफ (वय ४९, रा. नीता अपार्टमेंट, खडकी) याच्यावर गुन्हा दाखल केला आहे. याबाबत पोलिस हवालदार अमजद शेख यांनी खडकी पोलिस ठाण्यात फिर्याद दिली आहे. पोलिस हवालदार रेंगडे तपास करत आहेत.