‘पीएमसी रोड मित्र’वर ४२ खड्ड्यांची माहिती

पुणे, ता. १३ ः रस्त्यांवर पडलेल्या खड्ड्यांची माहिती महापालिकेस त्वरित मिळावी आणि संबंधित खड्डे दुरुस्ती तत्काळ व्हावी, यासाठी महापालिकेने सुरू केलेल्या ‘पीएमसी रोड मित्र’ हे मोबाईल ॲप सुरू केले. संबंधित ॲप पुणेकरांसाठी खुले झाल्यानंतर पहिल्याच दिवशी ४२ नागरिकांनी महापालिकेकडे खड्ड्यांबाबत माहिती दाखल होण्यास सुरुवात झाली. त्यानुसार, महापालिकेने संबंधित खड्डे तत्काळ दुरुस्त करण्यास सुरू केल्याचा दावा केला आहे.
पुणे शहराच्या वेगवेगळ्या भागांत पावसाळ्यामध्ये मोठ्या प्रमाणात खड्डे पडले आहेत. महापालिकेकडून खड्डे दुरुस्त केल्याचा दावा केला जात असला तरीही, प्रत्यक्षात रस्त्यांवर खड्ड्यांची समस्या कायम असल्याची सद्यःस्थिती आहे. या पार्श्‍वभूमीवर, रस्त्यांवरील खड्ड्यांची समस्या सुटावी आणि महापालिका प्रशासनही खड्ड्यांबाबत जागरूक राहावे, यासाठी महापालिका आयुक्त नवलकिशोर राम यांनी मोबाइल ॲप तयार करण्याच्या सूचना पथ विभागास दिल्या होत्या. त्यानुसार, पथ विभागाने ‘पीएमसी रोड मित्र’ या नावाचे ॲपची निर्मिती केली. मंगळवारी आयुक्त नवलकिशोर राम यांनी ॲपबाबतची माहिती पत्रकार परिषदेत दिली.
दरम्यान, बुधवारी सायंकाळपर्यंत संबंधित ॲपवर तब्बल ४२ नागरिकांनी शहराच्या वेगवेगळ्या भागांतील खड्ड्यांची माहिती व फोटो पत्त्यासह पाठविण्यास सुरुवात केली. त्यामध्ये खड्डे, चेंबरची झाकणे, पदपथ यासंबंधीची माहिती, फोटो महापालिकेस मिळत आहेत. संबंधित कनिष्ठ अधिकाऱ्यांना याबाबतची माहिती तत्काळ उपलब्ध होत असून, त्यांच्याकडून तातडीने दुरुस्तीची कामे केली जात असल्याचे पथ विभागाचे प्रमुख अनिरुद्ध पावसकर यांनी सांगितले.

अशी पाठवा खड्ड्यांबाबत माहिती
- मोबाइलमधील ‘प्ले स्टोअर’द्वारे ‘पीएमसी रोड मित्र’ ॲप डाउनलोड करा
- ॲपवर ‘सिटीझन’मध्ये जाऊन मोबाइल क्रमांक टाकून लॉगइन करा
- तुमच्या परिसरातील खड्ड्यांची माहिती, फोटो अपलोड करा
- संबंधित माहिती, फोटो संबंधित रस्त्याची जबाबदारी असणाऱ्या अधिकाऱ्याला मिळते
- संबंधित अधिकाऱ्याकडून प्रत्यक्षात पाहणी करून तत्काळ खड्डे दुरुस्तीचे काम हाती घेतले जाते