आंबेडकरी चळवळीचे उद्या ठिय्या आंदोलन

पुणे, ता. १३ : मंगळवार पेठेतील डॉ. बाबासाहेब आंबेडकर सांस्कृतिक भवनालगत राज्य सरकारच्या रस्ते विकास महामंडळाच्या (एमएसआरडीसी) जागेवर डॉ. बाबासाहेब आंबेडकर यांचे राष्ट्रीय स्मारक उभारावे, यासाठी शहरातील आंबेडकरी चळवळीने आंदोलन उभे केले आहे. याठिकाणी राष्ट्रीय स्मारकाची घोषणा होईपर्यंत आंदोलन सुरूच राहणार असून, १५ ऑगस्टला दुपारी एक वाजता लाक्षणिक ठिय्या आंदोलन करणार आहे, अशी माहिती डॉ. बाबासाहेब आंबेडकर सांस्कृतिक भवन विस्तार कृती समितीने दिली.

रस्ते विकास महामंडळाची जागा स्मारकाला मिळण्यासाठी आंबेडकरी चळवळ प्रयत्नशील आहे. राज्य सरकारने ही जागा खासगी विकसकाला ६० वर्षांच्या भाडेकरारावर दिल्यामुळे आंबेडकरी जनतेमध्ये तीव्र नाराजी निर्माण झाली होती. त्याचा परिणाम म्हणून या ठिकाणी डॉ. आंबेडकर यांचे राष्ट्रीय स्मारक व्हावे म्हणून आंबेडकरी चळवळीकडून आंदोलन करण्यात येत आहे. या जागेवर विकसकाकडून करण्यात येणाऱ्या कामाला स्थगिती देण्याचे आदेश नुकतेच प्राप्त झाले. परंतु राष्ट्रीय स्मारकाची घोषणा होत नाही, तोपर्यंत आंदोलन थांबणार नाही, असा एकमुखी निर्णय समितीच्या बैठकीत घेण्यात आला. १५ ऑगस्टला होणाऱ्या ठिय्या आंदोलनात सर्व समाजबांधवांनी शांततेत सहभागी व्हावे, असे आवाहन समितीने केले आहे.